Sońǵy 5 jylda elimizde óndiriste zardap shekkender sany 10,7 paiyzǵa azaidy. Bul týraly QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komiteti tóraǵasynyń orynbasary – QR Bas memlekettik eńbek inspektory Tólegen Ospanqulov aitty, dep habarlaidy QazAqparat.
«Qabyldanǵan is-sharalardyń nátijesinde sońǵy 5 jylda, naqtyraq aitqanda 2016-2020 jyldar aralyǵynda óndiriste zardap shekkenderdiń sany 10,7 paiyzǵa, 1683-ten 1500 adamǵa deiin azaidy. Onyń ishinde qaitys bolǵandar sany 16,2 paiyzǵa tómendedi.
Statistika jónindegi ýákiletti organdardyń derekterine sáikes, 2020 jyly zerttelgen kásiporyndardyń 1,6 mln jumysshysynyń 367 myń ne bolmasa árbir tórtinshisi ziiandy jáne qaýipti jaǵdaida jumys istegen. 2019 jyly bul kórsetkish 370 myń adamdy quraǵan bolatyn», - dedi Tólegen Ospanqulov Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, ziiandy jáne qaýipti jaǵdaida jumys isteitin jumysshylardyń kópshiligi Qaraǵandy, Pavlodar, Shyǵys Qazaqstan jáne Mańǵystaý oblystarynda baiqalǵan.
«Joǵary shý jáne diril jaǵdaiynda shamamen árbir ekinshi, jumys ainalasyndaǵy aýanyń gazdanýy men shańdanýy jaǵdaiynda árbir úshinshi adam jumys istegen. 94 myń adam aýyr dene eńbegimen shuǵyldanǵan. Jumysshylardyń qolaisyz eńbek jaǵdailary ekonomikalyq shyǵyndarǵa alyp keletindigi barlyǵymyzǵa málim. Byltyr elimizde 672 myń jumysshy ziiandy eńbek jaǵdaiynda jumys istegeni úshin 141 mln teńge somasynda túrli ótemaqy aldy. Bul kórsetkish 2010 jylmen salystyrǵanda 10 paiyzǵa joǵary», - dedi ol.
