QR IIDM qurylys jáne turǵyn úi-kommýnaldyq sharýashylyq isteri komiteti qurylys baǵasyn arzandatýdy kózdep otyr, dep habarlaidy "Ult aqparat".
Ministrliktiń málimetinshe, komitet nysandardyń qurylysynyń qunyna naqty limitterdi belgilegen. Aldaǵy ýaqytta óńirler boiynsha birdei nysandar qurylysynyń quny da birdei bolýy tiis. Ol úshin normativtik-tehnikalyq qujattarǵa tiisti ózgerister engizilip, barlyq áleýmettik jáne azamattyq-turǵyn úi nysandarynyń qurylysyna shekti qundy (limitterdi) belgileý boiynsha Jol kartasy ázirlengen.
«Ekinshiden, baǵa qalyptastyrýdyń ashyqtyǵyn qamtamasyz etetin aqparattyq júie ázirlendi. Baǵalaýdy qalyptastyrý tolyǵymen vedomstvolyq statistika negizinde júzege asyrylatyn bolady. Úshinshiden, zańnamaǵa úlgilik jobalardy mindetti qoldaný, jobalardyń biryńǵai elektrondyq bankin qurý, sondai-aq kvazimemlekettik sektor qarajaty esebinen birinshi jaýapkershilik deńgeiindegi nysandardyń saraptamasyn memlekettik saraptamaǵa berý bóliginde ózgerister engiziledi. Bul túzetýler biznes-klimatty damytý máseleleri boiynsha zań jobasy aiasynda ázirlenip, Parlamenti Májilisine engizildi», - dep habarlaidy ministrlikten.
Sondai-aq jobalardy jobalaýmen jáne saraptaýmen ainalysatyn jeke jáne zańdy tulǵalarǵa qoiylatyn biliktilik talaptaryn qatańdatý josparlanyp otyr. Smeta jasýshylarǵa qoiylatyn biliktilik talaptarynyń tizbesine, onyń ishinde beiindi biliminiń bolýyna taldaý júrgiziledi.
«Jambyl, Soltústik Qazaqstan oblystary men Nur-Sultan qalasynda pilottyq jobalardy iske asyrý jumysy jalǵasýda. Bekitilgen Jol kartasyna sáikes zańnamaǵa túzetýler ázirlendi. Memlekettik satyp alýdy josparlaý, qarjylandyrý, ótkizý júiesi salasyndaǵy túzetýlerdi osy jyldyń tamyzyna qarai bekitý josparlanyp jatyr. Túzetýler engizý boiynsha jaýaptylar – Ulttyq ekonomika jáne Qarjy ministrlikteri. Qurylys salasynda-qurylystyń bastapqy qunyn anyqtaý ádistemesi daiyndaldy. Tiisti ózgerister engizilgennen keiin ákimdikter pilottyq jobalardy iske asyra bastaidy. Biylǵy jyly qurylys salasynyń ashyqtyǵyn jáne tsifrlandyrylýyn tolyq qamtamasyz etetin qurylys normalaryn tsifrlandyrý jáne tsifrlyq modeldeý tehnologiialaryn engizý boiynsha jumys bastaldy. 2020 jyly 36 normativtik-tehnikalyq qujat, 2021-2023 jyldary – 195 qujat tsifrlandyrylatyn bolady», - delingen habarlamada.
