Qazaqstanda naýryzdan bastap temirjol biletteri qymbattaidy, dep habarlaidy "Ult aqparat" Jolaýshylar tasymaly» AQ resmi saityna silteme jasap.
«Áleýmettik mańyzy bar qatynastar boiynsha jolaýshylar tasymalyn júzege asyrýmen bailanysty tasymaldaýshynyń shyǵystaryn uzaq merzimdi sýbsidiialaýǵa arnalǵan sharttarǵa sáikes, 2021 jyldyń 1 naýryzynan bastap oblysaralyq jáne qala mańyndaǵy qatynastardaǵy barlyq áleýmettik mańyzy bar baǵyttarǵa temirjol biletteriniń quny 7% - ǵa artady», - delingen habarlamada.
«Jolaýshylar tasymaly» AQ jolaýshylardy tasymaldaý sapasyn jaqsartýǵa, onyń ishinde jyljymaly quram parkin jańartýǵa jáne qyzmet kórsetýdiń jańa standarttaryn engizýge baǵyttalǵan sharalardy júrgizip jatqanyn eske saldy.
«Jolaýshylar tasymaly» AQ 2018 jyldan 2020 jylǵa deiin 159 vagon satyp alǵanyn habarlaimyz. Atalmysh vagondar kelesi baǵyttar boiynsha qatynaityn jolaýshylar poiyzdarynyń quramynda bar. Olar: Almaty-Mańǵystaý, Nur-Sultan-Saryaǵash, Atyraý-Nur-Sultan, Atyraý-Almaty, Nur-Sultan-Arqalyq, Atyraý-Mańǵystaý, Almaty-Jezqazǵan jáne Nur-Sultan-Semei. Sonymen qatar, osy jyldyń 1 toqsanynda 50 jańa vagon jetkiziledi dep kútilýde. Bul vagondar kelesi baǵyttar boiynsha qatynaidy dep josparlanýda: Almaty-Mańǵystaý, Qyzylorda–Semei, Almaty-Óskemen jáne Nur-Sultan-Semei», - dep habarlaidy kompaniiadan.
