Qazaqstanda múlik ieleri birlestiginiń 1 132 jańa nysany quryldy. Bul týraly Qurylys jáne turǵyn úi-kommýnaldyq sharýashylyq isteri komiteti tóraǵasy orynbasary Erkebulan Daýylbaev aitty, dep habarlaidy QazAqparat.
«2020 jylǵy 7 qańtarda «Qazaqstan Respýblikasynyń keibir zańnamalyq aktilerine turǵyn úi-kommýnaldyq sharýashylyq máseleleri boiynsha ózgerister men tolyqtyrýlar engizý týraly» zań kúshine endi. Zań negizgi máselelerdi sheshýge baǵyttalǵan. Onyń biri - «bir úi - bir birlestik - bir esepshot» qaǵidaty boiynsha «múlik ieleriniń birlestigi» kommertsiialyq emes uiymyn qurý arqyly basqarý organdarynyń qyzmetin retteý. Zańdy iske asyrý maqsatynda 2 qaýly jáne 16 normativtik quqyqtyq akti qabyldandy»,- dedi ol Ortalyq kommýnikatsiialar qyzmetindegi baspasóz máslihaty barysynda.
Erkebulan Daýylbaevtyń atap ótýinshe, qazirgi ýaqytta elimizde múlik ieleri birlestiginiń 1 132 jańa basqarý nysany quryldy.
Onyń ishinde 539 múlik ieleriniń birlestigi, 593 jai seriktestik bar. Onyń basym bóligi Nur-Sultan jáne Almaty qalalarynda ornalasqan.
«Basqarýdyń jańa nysanyn qurý kórsetkishiniń tómendigi turǵyndardyń jinalys ótkizýin shekteitin karantin sharalaryna bailanysty ekeni sózsiz. Ózderińiz biletindei, turǵyn úi qatynastary salasyndaǵy qarqyndy ózgeristerge kóppáterli turǵyn úilerdi basqarý salasyndaǵy azamattardyń shaǵymy túrtki boldy. Menshik ieleri kóppáterli turǵyn úidi tolyq basqarý úshin kondominiým obektisiniń ortaq múlkiniń quramyn jáne ár páter iesiniń úlesin anyqtai otyryp tirkeý qajet. Kóppáterli turǵyn úidiń turǵyndary ortaq múlikke nazar aýdaryp, uqypty qaraýy tiis. Al bul óz kezeginde turǵyn úi qoryn saqtap qalýǵa múmkindik beredi. Sondyqtan páterlerdiń, turǵyn emes úi-jailar ieleriniń qarajattyń túsýi men jumsalýynyń ashyqtyǵyn qamtamasyz etý úshin óz úiinde múlik ieleriniń birlestigin nemese jai seriktestik qurý qajet ekenin túsinýi mańyzdy»,- dedi komitet tóraǵasynyń orynbasary.
