Qazaqstanda monopoliiaǵa qarsy jańa zań ázirlenedi. Mundai mindetti Úkimettiń keńeitilgen otyrysynda Memleket basshysy Qasym-Jomart Toqaev Úkimet pen Básekelestikti qorǵaý jáne damytý agenttigine tapsyrdy, dep habarlaidy QazAqparat.
«Bul tapsyrmalar blogyn búkil memlekettik apparat jumysynyń basymdyǵyna ainalýǵa tiis eń ótkir máselelerdiń birimen aiaqtaǵym keledi. Ol – básekeni damytý. Búgingi tańda eldiń ekonomikasy memlekettiń qatty aralasýynan ǵana emes, jeke monopolisterdiń básekeden tys áreketterinen de zardap shegip otyr. Olardyń qatarynda memlekettiń ózi qurǵan biryńǵai operatorlardy, jeke monopoliialardy da atap ótýge bolady. Sol sebepti Básekelestikti qorǵaý jáne damytý agenttigine osyndai qurylymdardy ustaýdyń qajettiline taldaý júrgizýdi tapsyramyn», - dedi Qasym-Jomart Toqaev Úkimettiń keńeitilgen otyrysynda.
Prezidenttiń aitýynsha, bizdiń elde osyndai 50-ge tarta monopoliia bar.
«Óz usynystaryńyzdy 1 maýsymǵa deiin maǵan ákelińizder. Artynsha ne isteý kerektigin sheshemiz. Olardy bálkim mártebesinen aiyramyz, kerek bolsa tipti jabamyz. Úkimet pen Básekelestikti qorǵaý jáne damytý komitetine 2022 jylǵy 1 qańtarǵa deiin adal básekelestikke kedergi keltirip turǵan negizgi problemalardy sheshýge baǵyttalǵan zań jobasyn qabyldaýdy tapsyramyn», - dedi Memleket basshysy.
Prezident osy zań qabyldanǵanǵa deiin memlekettik jáne jeke operatorlardy qurýǵa tyiym salynýy kerektigin eskertti.
«Atalǵan zań naryq sýbektilerine teń jaǵdai jasaýǵa baǵyttalýǵa tiis. Maǵan kásipkerlerden temirjol jelileriniń podezd joldarynyń jekelegen basshylaryna shaǵym kóp túsip jatyr. Olar jyljymaly quramnyń ótip ketýine ruqsat alýdyń ózi qiiamet-qaiymǵa ainalǵanyn jazady. Al olarda óteiin dese basqa jol joq. Bul ýchaskelerdi jekeshelendirý kezinde adal bastamalardy kútip edik, aqyry sózge kónbeitin monopolister paida boldy. Básekelestikti qorǵaý jáne damytý agenttigine Bas prokýratýramen birge podezdik jol operatorlarynyń jumysyn tekserýdi tapsyramyn», - dedi ol.
