sýret ashyq derekkózden alyndy
Qazaqstanda million teńgeden joǵary jalaqy alatyn 81 myńnan astam adam bar. Onyń 24 myńǵa jýyǵy taý-ken ónerkásibinde jumys isteidi. Zeinetaqy qoryndaǵy qarjy 17 mlrd teńgeden asty, dep habarlady "Astana" telearnasy.
Elimizde 81 myńnan astam adam milliondap jalaqy alady. Bul - jalpy halyqtyń 2 paiyzy. Olar - eshqandai da jeke kásipker nemese shendi-shekpendi emes, qarapaiym jumysshylar. Taý-ken ónerkásibinde shamamen 23 myń 600 adam qomaqty jalaqy alady. Al 9 myńnan astamy ónerkásip salasynda eńbek etedi.
Úshinshi orynda qarjy jáne saqtandyrý salasy tur. Onda 8600 adam jumys isteidi. Qurylysta 7800, saýdada - 5500 adam milliondap tabys tabýda. Jalaqysy qomaqty erler áielderden 3 ese kóp.
Sondai-aq elimizde zergerlik buiymdarǵa suranys artqan. Jyl basynan beri 839 mln teńgeniń buiymy óndirilip, 110 mln AQSh dollaryna teń bolatyn baǵaly buiymdar importtaldy. Byltyr óndiris kólemi 1,36 mlrd teńgege jetken edi. Baǵaly metalldan jasalǵan buiymdardyń baǵasy kún sanap ósýde. Neke saqinasy 32 paiyzǵa qymbattasa, saǵattar men áshekeiler 30 paiyzǵa kóterilgen. Soǵan qaramastan, kópshilik altyn alyp jatyr. Múmkin quny túspeitin dúniemen bailyq jinaýdy qup sanaityn shyǵar.
"Altyn kúiinde saqtasańyz, kez kelgen jaǵdaida qoljetimdi bolady. Aparasyz, ornyna qalaǵan nárseńizdi ala alasyz. Bul bir jaǵynan azamattardyń belsendiligin, tabystylyǵyn arttyrýdyń bir joly bolyp otyr", - deidi ekonomist Ǵalymjan Esqarauly.
Zeinetaqy qoryndaǵy qarjy 17 mlrd teńgeden asty. Jyl basynan beri jinaqtaǵy aqsha 2,6 trln teńgege ósken. Bul qarjynyń 96 paiyzy mindetti zeinetaqy jarnalarynan túsken. Eńbek demalysyndaǵy jandarǵa 405 mlrd teńgeden astam qarjy tólense, jas boiynsha tólemder 109 mlrd teńgeden asqan. Turǵyn úi jaǵdailaryn jaqsartýǵa jáne emdelýge berilgen birjolǵy zeinetaqy tólemderi 198,75 mlrd teńgeni qurady.
