Qazaqstan Respýblikasynyń Qarýly Kúshteri Áýe qorǵanysy kúshteriniń bas qolbasshysy Nurlan Ormanbetov Qaraǵandy oblysyndaǵy áskeri ushaq apatyna bailanysty mán-jaidy túsindirdi, dep habarlaidy QazAqparat.
«2020 jyldyń 16 sáýirinde saǵat 19.03 shamasynda ekipajdy jaýyngerlik kezekshilikke daiarlaý boiynsha josparly ushý saparyn oryndaý barysynda Qaraǵandy qalasyndaǵy aerodromnyń ońtústigine qarai Qazaqstannyń áýe kúshterine qarasty MiG-31 joiǵysh ushaǵy qulady. Ushaq ushqannan keiin qozǵaltqyshtardyń birinen órt shyqqan. Ekipaj turǵylyqty eldimekenge ushaqty qulatpai, ashyq alańǵa burý amalyn qarastyrdy. Bortta 2 adam bolǵan. Ushqyshtar quramynyń daiarlyq deńgeii josparly ushý tapsyrmasynyń talabyna sai kelgen. Joiǵysh ushaqty tájiribeli áskeri ushqyshtar basqarǵan», - dedi Nurlan Ormanbetov OKQ-da onlain rejimde ótken baspasóz máslihatynda.
Onyń aitýynsha ushaqty basqarǵan podpolkovnik Arman Qurmanǵalievtiń áýe sapary boiynsha 900 saǵattyq tájiribesi, al podpolkovnik Ivan Gavrilkonyń 1000 saǵatqa dýq tájiribesi bar.
«Áýe apatynyń ornyna birinshi bolyp izdeý-qutqarý qyzmetiniń kezekshi tikushaq pen Qazaqstannyń áýe kúshteriniń jerde qutqarý komandasy kelip jetti. Ushqyshtarǵa dál sol orynda alǵashqy meditsinalyq kómek kórsetildi. Osydan keiin olar Qaraǵandy oblystyq aýrýhanasyna jetkizildi. Qazirgi ýaqytta ushqyshtarǵa tiisti meditsinalyq kómek kórsetildi. Bireýiniń jaǵdaiy qanaǵattanarlyq deńgeide bolsa, ekinshisiniń aýyrlyǵy ortasha. Sonymen qatar, Qorǵanys ministriniń atalǵan aviatsiialyq oqiǵany zertteý boiynsha komissiia quryldy. Komissiia jumysty tekserip, aldyn alý jumystaryn júrgizgennen keiin MiG-31 joiǵysh ushaqtary qaitadan ushyryla bastaidy», - dedi ol.
Eske sala ketsek keshe Qaraǵandy oblysynda áskeri ushaqtyń apatqa ushyraǵany týraly habarlaǵan edik. Qulaǵan ushaqtan eki sarbaz zardap shekti.
