قازاقستان رەسپۋبليكاسىنىڭ قارۋلى كٷشتەرٸ ەۋە قورعانىسى كٷشتەرٸنٸڭ باس قولباسشىسى نۇرلان ورمانبەتوۆ قاراعاندى وبلىسىنداعى ەسكەري ۇشاق اپاتىنا بايلانىستى مەن-جايدى تٷسٸندٸردٸ, دەپ حابارلايدى قازاقپارات.
«2020 جىلدىڭ 16 سەۋٸرٸندە ساعات 19.03 شاماسىندا ەكيپاجدى جاۋىنگەرلٸك كەزەكشٸلٸككە دايارلاۋ بويىنشا جوسپارلى ۇشۋ ساپارىن ورىنداۋ بارىسىندا قاراعاندى قالاسىنداعى اەرودرومنىڭ وڭتٷستٸگٸنە قاراي قازاقستاننىڭ ەۋە كٷشتەرٸنە قاراستى ميگ-31 جويعىش ۇشاعى قۇلادى. ۇشاق ۇشقاننان كەيٸن قوزعالتقىشتاردىڭ بٸرٸنەن ٶرت شىققان. ەكيپاج تۇرعىلىقتى ەلدٸمەكەنگە ۇشاقتى قۇلاتپاي, اشىق الاڭعا بۇرۋ امالىن قاراستىردى. بورتتا 2 ادام بولعان. ۇشقىشتار قۇرامىنىڭ دايارلىق دەڭگەيٸ جوسپارلى ۇشۋ تاپسىرماسىنىڭ تالابىنا ساي كەلگەن. جويعىش ۇشاقتى تەجٸريبەلٸ ەسكەري ۇشقىشتار باسقارعان», - دەدٸ نۇرلان ورمانبەتوۆ وكق-دا ونلاين رەجيمدە ٶتكەن باسپاسٶز مەسليحاتىندا.
ونىڭ ايتۋىنشا ۇشاقتى باسقارعان پودپولكوۆنيك ارمان قۇرمانعاليەۆتٸڭ ەۋە ساپارى بويىنشا 900 ساعاتتىق تەجٸريبەسٸ, ال پودپولكوۆنيك يۆان گاۆريلكونىڭ 1000 ساعاتقا دۋق تەجٸريبەسٸ بار.
«ەۋە اپاتىنىڭ ورنىنا بٸرٸنشٸ بولىپ ٸزدەۋ-قۇتقارۋ قىزمەتٸنٸڭ كەزەكشٸ تٸكۇشاق پەن قازاقستاننىڭ ەۋە كٷشتەرٸنٸڭ جەردە قۇتقارۋ كومانداسى كەلٸپ جەتتٸ. ۇشقىشتارعا دەل سول ورىندا العاشقى مەديتسينالىق كٶمەك كٶرسەتٸلدٸ. وسىدان كەيٸن ولار قاراعاندى وبلىستىق اۋرۋحاناسىنا جەتكٸزٸلدٸ. قازٸرگٸ ۋاقىتتا ۇشقىشتارعا تيٸستٸ مەديتسينالىق كٶمەك كٶرسەتٸلدٸ. بٸرەۋٸنٸڭ جاعدايى قاناعاتتانارلىق دەڭگەيدە بولسا, ەكٸنشٸسٸنٸڭ اۋىرلىعى ورتاشا. سونىمەن قاتار, قورعانىس مينيسترٸنٸڭ اتالعان اۆياتسييالىق وقيعانى زەرتتەۋ بويىنشا كوميسسييا قۇرىلدى. كوميسسييا جۇمىستى تەكسەرٸپ, الدىن الۋ جۇمىستارىن جٷرگٸزگەننەن كەيٸن ميگ-31 جويعىش ۇشاقتارى قايتادان ۇشىرىلا باستايدى», - دەدٸ ول.
ەسكە سالا كەتسەك كەشە قاراعاندى وبلىسىندا ەسكەري ۇشاقتىڭ اپاتقا ۇشىراعانى تۋرالى حابارلاعان ەدٸك. قۇلاعان ۇشاقتان ەكٸ سارباز زارداپ شەكتٸ.
