Qazaqstanda memlekettik baǵdarlamardy ulttyq jobalar almastyra ma? Reformalar jónindegi Joǵary keńestiń úshinshi otyrysy talqylanǵan suhbatta Strategiialyq josparlaý jáne reformalar agenttiginiń tóraǵasy Qairat Kelimbetov osy suraqqa jaýap berdi, dep habarlaidy QazAqparat.
«Árbir jumystyń jobalyq amal-ádiske beiimdelýi – óte mańyzdy sharýa. Ózderińiz biletindei, aýqymdy korporatsiialar men jeke sektorlardaǵy iri kompaniialar jobalyq ádiske kóshe bastady. Tipti búkil álemde memlekettik júieler de osy amalǵa kóshýde. Ulybritaniia, Malaiziia elderi birinshi bolyp jobalyq basqarýǵa ótip ketti. Bul tájiribe postkeńestik elderde qoldanyla bastady. 2018 jyldyń ózinde biz jobalyq keńselerdi qura bastaǵanymyzdy bilesizder. Osy rette memlekettik josparlaýdyń jańa quraly paida bolady. Ol – ulttyq jobalar dep atalady. Bul – úsh ideialy mańyzdy mindetterden turady. Eń aldymen bul sharalar kesheni adamtsentristik sipatqa ie. Iaǵni eń aldymen adamdar birinshi orynǵa qoiylady. Qandai da bir joba adamdarǵa ne ákelenetinine taldaý jasalady. Ekinshi mindet - jobalyq ádis. Ulttyq joba búkil ekonomikaǵa áser etetin bolady», - dedi Qairat Kelimbetov sarapshy Rahym Oshaqbaevpen «Habar 24» arnasynda júrgizgen suhbatynda.
Osy kezde Rahym Oshaqbaev spikerden «Ulttyq jobalar memlekettik baǵdarlamardyń ornyna kele me?» dep surady.
«Memleket basshysynyń 1 shildege deiin negizgi memleketik baǵdarlamalardan ulttyq jobalarǵa kóshý jumysyn aiaqtaý týraly mindeti bar. Ulttyq jobalar – keshendi sharalardyń yqsham mazmuny. Olar eń aldymen kózdelgen maqsatqa jetýdi, osy maqsattardyń jetken satylarynyń mańyzdylyǵyn, resýrstardyń qoljetimdiligin kózdeidi. Bul jobalar tsifrlandyrylady. Naqty qandai memlekettik maqsat kózdelip otyrǵany aiqyndalady. Naqty kim jaýapty ekeni bekitiledi. Bul baǵytta aitarlyqtai qarajat bólinedi. Sol sebepti qandai da bir tapsyrma qanshalyqty oryndalyp jatqanyn taldaityn memlekettik organdar men halyqtyń arasyndaǵy keri bailanys bolǵany durys», - dedi ol.
Eske sala ketsek, búgin Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysy ótken bolatyn. Jiynda Qazaqstan Respýblikasynyń 2025 jylǵa deiingi ulttyq damý josparyn ázirleý, Memlekettik josparlaýdyń jańa júiesi, Memlekettik basqarýdy damytýdyń 2030 jylǵa deiingi tujyrymdamasy, 2021-2025 jyldarǵa arnalǵan jekeshelendirý josparynyń jobasy, sondai-aq, Jedel reformalar paketi jáne ulttyq halyq sanaǵyn ótkizý máseleleri qarastyryldy. Otyrysta Prezident memlekettik basqarýdy damytý úshin is-qimyldar josparyn qabyldaýdy tapsyrdy.
