Foto: QR TSM
Astana qalasyndaǵy №45 mektepte elimizdegi dziýdodan alǵashqy mamandandyrylǵan mektep zaly saltanatty túrde ashyldy. Joba mektep sportyn damytý maqsatynda Týrizm jáne sport ministrligi, Oqý-aǵartý ministrligi jáne sport uiymdarynyń birlesýimen júzege asyrylyp otyr, dep habarlaidy Ult.kz.
Ashylý rásimine Týrizm jáne sport ministri Erbol Myrzabosynov, Oqý-aǵartý ministri Juldyz Súleimenova, Qazaqstan dziýdo federatsiiasynyń prezidenti Qýanyshbek Esekeev, Halyqaralyq dziýdo federatsiiasynyń (IJF) ókilderi, «Jeńis» sport klýbynyń músheleri, sondai-aq dziýdodan ulttyq qurama sportshylary, Olimpiada jáne álem chempionattarynyń júldegerleri Ábiba Ábýjaqynova men Ǵusman Qyrǵyzbaev qatysty.
Joba Ulttyq ǵylymi-praktikalyq dene tárbiesi ortalyǵynyń Halyqaralyq dziýdo federatsiiasymen (IJF) ózara yntymaqtastyǵy jáne QR Týrizm jáne sport ministrliginiń qoldaýymen iske asyrylyp jatqan Judo in Schools («Mekteptegi dziýdo») baǵdarlamasy aiasynda júzege asýda. Baǵdarlama zamanaýi qural-jabdyqtarmen qamtylǵan, ádistemelik negizi bar mektep dziýdo zaldarynyń jelisin kezeń-kezeńimen qalyptastyrýdy kózdeidi.
Alǵashqy kezeńde №45 mekteptiń («Keleshek mektebi») dziýdo zaly tolyqtai zamanaýi sporttyq qural-jabdyqtarmen jabdyqtalyp, oqýshylarǵa arnalǵan arnaiy inventar men dziýdo kimonolary tegin tabystaldy.
Sonymen qatar saltanatty shara barysynda Týrizm jáne sport ministrligi, Oqý-aǵartý ministrligi, Halyqaralyq dziýdo federatsiiasy, Qazaqstan dziýdo federatsiiasy jáne «Jeńis» sport klýby arasynda yntymaqtastyq týraly memorandýmǵa qol qoiyldy. Qujat mektep sportyn damytý baǵytynda taraptardyń júieli ári turaqty ózara is-qimylyn qamtamasyz etýge baǵyttalǵan.
Aita keteiik, Qazaqstanda dziýdo sporty qarqyndy damyp keledi. Eldos Smetovtiń Parij Olimpiadasynda tarihi altyn medal jeńip alýynan keiin bul sport túrine degen qyzyǵýshylyq aitarlyqtai artqan. Qazirgi tańda elimizde dziýdomen shamamen 90 myń adam ainalysady, al sportshylardy daiarlaýmen 1300-ge jýyq jattyqtyrýshy shuǵyldanady.
