Qostanai oblysynda alǵash ret at sportynyń tózimdilikke arnalǵan halyqaralyq Allur Endurance CUP 2026 týrniri ótti. Jarysqa bes elden 36 shabandoz qatysyp, júldeli jeti orynnyń barlyǵyn qazaqstandyq sportshylar jeńip aldy. Bas júlde Qostanaidaǵy Allur zaýytynda shyǵarylǵan Chevrolet Cobalt avtokóligi boldy.
Ǵasyrlar boiy jylqy ulttyq mádeniettiń ajyramas bóligine ainalǵan Qazaqstan búginde zamanaýi at sportynyń damýyna jańa múmkindikter ashyp otyr. Sonyń jarqyn úlgisi – Respýblika kúni qarsańynda qazaqstandyq Allur avtomobil kompaniiasynyń qoldaýymen ótken Allur Endurance CUP 2026 týrniri.
Foto: Allur
Jarysqa Qazaqstan, Vengriia, Siriia, Ulybritaniia jáne Malaiziia elderiniń ókilderi qatysty. Sportshylar FEI halyqaralyq standarttaryna sáikes CEI 1* sanatyndaǵy 100 shaqyrymdyq qashyqtyqty baǵyndyrdy. Jarystyń ótý barysyn Birikken Arab Ámirlikterinen kelgen tóreshiler qadaǵalady.
Tózimdilikke arnalǵan at jarysy – jyldamdyq jeńistiń jalǵyz sharty bolyp sanalmaityn erekshe sport túri. Shabandoz júktemeni durys bóle bilýi, jylqynyń jaǵdaiyn sezinip, búkil qashyqtyq boiy onyń densaýlyǵyn baqylaýy qajet. Bul qasietter qazaqtyń dástúrli atqa miný mádenietin de erekshelendiredi.
Allur kompaniiasy úshin mundai jarystardy qoldaý – otandyq jylqy sharýashylyǵyn damytýǵa, at sportyn keńinen nasihattaýǵa jáne ulttyq murany saqtaýǵa baǵyttalǵan júieli jumystyń bir bóligi. Kompaniia jekelegen sporttyq is-sharalardy qoldaýmen ǵana shektelmei, qazaqstandyq shabandozdar men otandyq jylqy tuqymdarynyń halyqaralyq arenada laiyqty óner kórsetýine múmkindik beretin jaǵdai qalyptastyrýǵa úles qosýdy kózdeidi.
«Qazaqstan úshin jylqy – tarihtyń bir bóligi ǵana emes. Bul – saqtap qana qoimai, damytýǵa tiisti ulttyq bailyǵymyz. Bizde biregei jylqy tuqymdary, talantty sportshylar jáne ǵasyrlar boiy qalyptasqan dástúrler bar. Bizdiń mindetimiz – osy murany zamanaýi halyqaralyq standarttarmen ushtastyrý. Sondyqtan Allur at sportyn qoldaýdy uzaq merzimdi jumys retinde qarastyrady. Qazaqstannyń álemge tek bai at sporty dástúrleriniń otany retinde ǵana emes, myqty sportshylary men damyǵan jylqy sharýashylyǵy bar el retinde tanylǵanyn qalaimyz», – dedi Allur zaýytynyń atqarýshy direktory Arǵulan Maiqonov.
Týrnirdiń Qostanai jáne adai jylqy tuqymdaryn damytý úshin de mańyzy zor. Halyqaralyq jarystar olardyń tózimdiligin kórsetýge, otandyq jylqy ósirýshilerdiń múmkindikterin keńeitýge jáne sportshylardyń sheteldik jarystarǵa qatysý úshin qajetti biliktilikke ie bolýyna jol ashady.
«Biz bul jarystardy eń aldymen otandyq jylqy sharýashylyǵyn damytý jáne saqtaý maqsatynda ótkizemiz. Qostanai oblysynyń atynan jergilikti tuqymdy jylqylar men olardyń býdandarynyń qatysýy biz úshin erekshe mańyzdy. Allur kompaniiasynyń qoldaýynyń arqasynda halyqaralyq deńgeidegi jarystar ótkizip, sportshylarymyz ben jylqy ósirýshilerimizge jańa múmkindikter ashyp otyrmyz», – dep atap ótti Qostanai Argymagy qorynyń direktory Altai Bimen.
Jarystyń joǵary deńgeide uiymdastyrylǵanyn sheteldik qonaqtar da atap ótti. Bala kezinen at sportymen ainalysyp kele jatqan vengriialyq shabandoz Orhideia Mihok Qostanaiǵa alǵash ret kelip, qazaqstandyq sportshylardyń daiyndyǵyna joǵary baǵa berdi.
«Qashyqtyqqa júgirý jarystarynda shabandoz ben jylqy arasyndaǵy ózara túsinistiksiz nátijege jetý múmkin emes. Jarys bastalmas buryn jylqynyń minezin sezinip, onymen bailanys ornatý men úshin mańyzdy boldy. Sondai-aq qazaqstandyq shabandozdardyń qanshalyqty myqty ári tózimdi ekenin kórdim. Munda tabiǵat keremet, atmosferasy da erekshe», – dedi sportshy.
Týrnirdiń basty nátijesi – qazaqstandyq shabandozdardyń sózsiz jeńisi. Olar júldeli jeti orynnyń barlyǵyn ielendi. Eń úzdik nátijeni Mańǵystaý oblysynyń ókili kórsetip, Qostanaida shyǵarylǵan jańa Chevrolet Cobalt avtokóliginiń kiltin Arǵulan Maiqonovtyń qolynan aldy. Qalǵan júldegerler aqshalai syilyqtarǵa ie boldy.
Foto: Allur
Allur Endurance CUP 2026 týrniri Qazaqstanda halyqaralyq deńgeidegi at sportyn damytýǵa qajetti áleýettiń bar ekenin kórsetti. Onyń qatarynda myqty sportshylar, biregei jylqy tuqymdary jáne bai ulttyq dástúrler bar. Al otandyq biznestiń osyndai bastamalarǵa júieli túrde qoldaý kórsetýi ulttyq murany naqty sporttyq jetistikterge ainaldyryp, óńirler úshin jańa múmkindikter ashýǵa yqpal etedi.
Foto: Allur
