Qazaqstanda meditsinalyq qyzmetter qymbattady. Bir jyl ishinde alǵashqy qabyldaý quny - 10%, tekserý men analiz quny - 8-13 paiyzǵa kóterildi, dep habarlaidy energyprom.kz.
Shilde aiynyń qorytyndysy boiynsha QR-daǵy meditsinalyq qyzmetter ótken jylmen salystyrǵanda birshama ulǵaiǵan: dárigerdiń alǵashqy qabyldaýy - 9,9%-ǵa, ish qýysyn ýltradybystyq zertteý - 13%-ǵa, jalpy qan analizi - 7,6%-ǵa jáne jalpy nesep analizi - 8,5%-ǵa qymbattaǵan.
Massaj qyzmetteri 6,5%-ǵa, shipajai qyzmetteri - 6,8%-ǵa kóterilgen. Stomatologiia qyzmetterinde de baǵalardyń ósýi baiqalady: tis julý quny bir jylda 10%-ǵa ósken.
Sonymen birge, densaýlyq saqtaý júiesindegi eńbekaqy ósimi aitarlyqtai joǵary emes. 2017 jyldyń II toqsan qorytyndysynda jalpy densaýlyq saqtaý jáne áleýmettik qyzmetter salasyndaǵy ortasha ailyq jalaqy ósimi 6,1% paiyz ǵana bolǵan, bul rette naqty jalaqy indeksi sala qyzmetkerleriniń satyp alý qabiletiniń 1,3%-ǵa azaiǵanyn kórsetti.
Ózge áriptesterimen salystyrǵanda, aýrýhana uiymdary qyzmetkerleriniń eńbekaqysy kóbirek ósken (bir jylda 7%-ǵa), degenmen bul sala qyzmetkerleriniń de satyp alý qabileti bir jylda 0,5%-ǵa tómendegen.
Odan bólek, densaýlyq saqtaý jáne áleýmettik qyzmetter salasynyń qyzmetkerleri QR boiynsha jalpy qyzmetkerlerden 24,3%-ǵa tómen jalaqy alady.
Degenmen, densaýlyq saqtaý ministri Eljan Birtanov bolashaqqa jaǵymdy boljam jasap otyr: mindetti meditsinalyq saqtandyrý júiesindegi dárigerlerdiń ortasha jalaqysy artatyn bolady. Ministrdiń pikirinshe, klinikalardyń tabysy kóbeigen soń, jalaqy ósedi. Úzdik klinikalar báseke negizinde óz tabystaryn kóbeitip, dárigerleriniń jalaqysyn kótere alady.
Eske sala ketsek, MÁMS boiynsha alǵashqy jarnalar men aýdarymdar biylǵy shilde aiynda túse bastady.
2017 jyldyń II toqsanynyń qorytyndysy boiynsha, bir jylda densaýlyq saqtaý jáne áleýmettik qyzmetter júiesindegi qyzmetkerler sany 8%-ǵa ósken. Bárinen buryn aýrýhana uiymdarynyń qyzmetkerler sany artqan: olardyń tizimdik sany 8%-ǵa, naqty sany 7,9%-ǵa kóbeigen. Áleýmettik qyzmet salasynda turǵylyqty jermen qamtamasyz etpeitin qyzmet kórsetý segmentinde qyzmetkerlerdiń kóbeigeni baiqalady, olardyń tizimdik sany 9,3%-ǵa, naqty sany 11,5%-ǵa artqan.
Jalpy alǵanda, ótken jyly densaýlyq saqtaý salasyndaǵy jumyspen qamtýdyń aitarlyqtai óskeni baiqalady. 2016 jyldyń qorytyndysy boiynsha, dárigerler sany 7%-ǵa, 74,6 myńǵa deiin artqan, ortasha meditsinalyq qyzmetkerler sany - 4,2%-ǵa (170,8 myń adam) ósken. 2015 jyly dárigerler sanynyń artýy 1,2%-dy, ortasha meditsinalyq qyzmetkerler sanynyń kóbeiýi - 2,4%-dy quraǵan.
