Qazaqstannyń 9 oblysy men respýblikalyq mańyzy bar Nur-Sultan, Almaty jáne Shymkent qalalarynda QR Parlamenti Májilisi men máslihattar depýtattaryna daýys berý bastaldy, dep habarlaidy "Ult aqparat".
Konstitýtsiialyq merzimge sai ótip jatqan Májilis sailaýyna elimizde tirkelgen 5 saiasi partiia, atap aitqanda, «Aýyl» halyqtyq-demokratiialyq patriottyq partiiasy, «Nur Otan» partiiasy, «ADAL» saiasi partiiasy, Qazaqstannyń «Aq jol» demokratiialyq partiiasy, «Qazaqstannyń Halyq partiiasy» depýtattyq mandattan úmitti. Bul partiialar barlyq deńgeidegi jergilikti máslihattarǵa da óz kandidattaryn usynǵan.
Májiliske 5 partiiadan barlyǵy 312 kandidat, onyń ishinde: «Aýyl» halyqtyq-demokratiialyq patriottyq partiiasynan 19; «Nur Otan» partiiasynan 126; «ADAL» saiasi partiiasynan 16; Qazaqstannyń «Aq jol» demokratiialyq partiiasynan 38 jáne «Qazaqstannyń Halyq partiiasynan» 113 adam bar.
Al jergilikti máslihattarǵa 832, onyń ishinde «Aýyl» HDPP-nan – 158, «Nur Otan» partiiasynan - 216, «ADAL» SP-nan – 215, «Aq jol» QDP-nan – 174, «Qazaqstan Halyq partiiasynan» 69 partiialyq tizim tirkeldi.
Sailaý týraly Konstitýtsiialyq zańǵa sáikes, daýys berý ýaqyty standartty (saǵat 7.00-20.00 aralyǵy) bolady.
Batys Qazaqstan, Aqtóbe, Atyraý, Mańǵystaý, Qyzylorda oblystarynda ýaqyt aiyrmashylyǵyna bailanysty sailaý ýchaskeleri jergilikti ýaqyt boiynsha saǵat 07.00-de - Nur-Sultan ýaqyty boiynsha saǵat 08.00-de ashylady.
