QR Mádeniet jáne sport vitse-ministri Serik Jarasbaev Qazaqstanda mánerlep syrǵanaý sporty qalai damyp jatqanyn aitty, dep habarlaidy QazAqparat.
«Qazaqstan quramasy mánerlep syrǵanaýdan abyroily bolǵan edi. Elimizdi kúlli álemge tanytqan Denis Ten aramyzda joq, Elizabet Tursynbaeva da kásibi mansabyn aiaqtady. Jalpy mánerlep syrǵanaý sportyn nasihattaý jáne damytý isinen memleket shet qalǵan syńaily. Buǵan ne sebep? Mánerlep syrǵanaý sportyn damytýǵa ne kedergi?», - dep suraq qoidy jýrnalist Ortalyq kommýnikatsiialar qyzmetinde ótken baspasóz máslihatynda.
«Mánerlep syrǵanaýdan Denis Ten Sochidegi Olimpiadadan júlde ákelgennen keiin, bizde bul sport qarqyndy damý ústinde. Qazir de toqtap qaldy dep aitýǵa bolmaidy. Nege deseńiz, Denistiń jolyn Elizabet Tursynbaeva, Aiza Mambekova sekildi sportshylarymyz jalǵastyryp keledi. Qazir Elizabet te óz mansabyn toqtatty, biraq artynda izbasarlary bar. Olardy daiyndaýǵa múmkindik bar dep esepteýge bolady. Qysqy Spartakiada oiyndarynda kóptegen óńirlerden sportshylarymyz qatysyp, nátije kórsetken bolatyn. Tek Almaty men Nur-Sultannan emes, Qyzylorda men Mańǵystaýdan da jas sportshylar kóringen edi. Endi Olimpiada óte úlken deńgei bolǵandyqtan, sportshylarymyz biraz ýaqyttan keiin daiyn bolady degen senimdemin. Úkimet óz tarapynan sol sport túrine bar kúshin salyp jatyr, jańa nysandar iske qosyldy, qysqy muz aidyndary ashylyp jatyr. Ońtústik aimaqtarda da bul jumys jalǵasýda», - dedi Jarasbaev.
Aita keteiik, XXIV qysqy Olimpiada oiyndary Qytaidyń Beijiń qalasynda, 2022 jyldyń 4 men 20 aqpan aralyǵynda ótedi. Onda jalpy sany 109 medal sarapqa salynady. Jarystar Beijiń qalasynan bólek qasyndaǵy Iantsin jáne Chjiantsziakoý qalalarynda da ótedi.
