Qazaqstanda iri qara mal basynyń sany 8 mln-nan asty. Bul týraly Aýyl sharýashylyǵy ministrligi habarlady.
«2021 jyly mal sharýashylyǵynyń jalpy ónim kólemi 3,6 paiyzǵa artyp, 3104,5 mlrd teńgeni qurady. Qabyldanǵan sharalardyń arqasynda mal men qus sany turaqty qarqynmen ósip keledi. 2021 jyldyń qorytyndysy boiynsha iri qara mal basy 8,2 mln basty qurady, bul 2020 jyldyń deńgeiinen 4,3% artyq. Qoi men eshki basy 4% (20,9 mln bas), jylqy basy 10,5% (3,5 mln bas), túie basy 6,9%-ǵa (243,4 myń bas) ulǵaidy. Sonymen qatar sharýashylyqtardyń barlyq sanatynda qus sany 10,6 paiyzǵa, 47 787,4 myń deiin ósti», - delingen ministrlik málimetinde.
Sáikesinshe, mal sharýashylyǵy ónimderin óndirýde: et – 5% jáne sút - 3,2% ulǵaiyp otyr.
«Mal azyǵymen qamtamasyz etý salasynda 2022 jylǵa 24,2 mln tonna shóp, 1,6 mln tonna pishendeme, 2 mln tonna súrlem, 4,8 mln tonna saban jáne 5,2 mln tonna qunarly jem daiyndaldy. Bul aýyl turǵyndaryna aýyl sharýashylyǵy qurylymdary men jeke qosalqy sharýashylyqtarynda mal basyn qysqy kezeńge azyqpen qamtamasyz etýge múmkindik beredi. Budan bólek, ministrlik oblystardyń ákimdikterimen birlesip, aýyl sharýashylyǵy janýarlaryn azyqpen qamtamasyz etýdiń júieli sharalaryn pysyqtady. Olar 2022-2025 jyldarǵa arnalǵan jem-shóp óndirisi salasyn damytý jónindegi Jol kartasynda kórinis tapty», - dep atalyp ótken vedomstvo aqparatynda.
