Qazaqstanda kúzde azyq-túlik baǵasy qymbattaýy múmkin be? Bul suraqqa Saýda jáne integratsiia vitse-ministri Azamat Asqaruly jaýap berdi, dep habarlaidy "Ult aqparat".
«Bizde jalpy áleýmettik mańyzy bar azyq-túliktiń 19 túri boiynsha túsim jaman emes. Bul eń aldymen – kókónis pen jemis-jidek. Fermerlerge eń aldymen ishki naryqty toltyrý men el ishinde arzan baǵaǵa satý týraly qarsy mindettemelerdi júktei otyryp, biz azyq-túlik taýarlaryn arzandatýǵa qol jetkizemiz. Sonymen birge ainalmaly shema, saýda jelilerine qarsy mindettemelerdi júkteý, logistikany ońtailandyrý sekildi sharalar azyq-túlik baǵasyn arzandatýǵa aitarlyqtai sep bolady», - dedi Azamat Asqaruly OKQ-da ótken baspasóz máslihatynda.
Vitse-ministrdiń aitýynsha, jyl basynan beri elde áleýmettik mańyzy bar azyq-túlik baǵasy 5,7 paiyzǵa qymbattaǵan.
«Elimizde áleýmettik mańyzy bar azyq-túlik baǵasy 9,1 nemese 7 paiyzǵa deiin qymbattaǵan kezder bolǵan. Karantin ýaqytynda shekti baǵalardy bekitý arqyly biz baǵany ustap qaldyq. Álbette bul – naryqtyq sharalar emes. Karantinnen keiin shekti baǵalardy alyp tastadyq. Alaida jergilikti oryndarda azyq-túlik baǵasyn retteý ákimdikterdiń quzireti ekenin eske salǵym keledi. Eger kúzde áleýmettik mańyzy bar taýarlardyń baǵasy ósse – Saýda jáne integratsiia ministrligi shekti baǵalardy qoiýǵa daiyn. Biraq eń bastysy – azyq-túliktiń qazirgi kólemi jetkilikti. Sondyqtan biz baǵanyń ósýin 6-7 paiyzdyq deńgeide kútip otyrmyz», - dedi Azamat Asqaruly.
