17 aqpan kúni Qazaqstan densaýlyq saqtaý ministrligi koronavirýstan taǵy 14 adam qaitys bolǵanyn habarlady. Onyń ekeýine PTR testimen rastalmaǵan koronavirýs pnevmoniiasy diagnozy qoiylǵan.
Osylaisha, Qazaqstanda koronavirýs indeti kelgeli virýs juqtyrǵany PTR testimen rastalǵan naýqastar arasynda qaitys bolǵandardyń sany 2664-ke jetip otyr. Bilik bul statistikaǵa Covid infektsiiasyn juqtyrǵany rastalǵan, biraq "ilespe aýrýdan qaitys boldy" degen júzdegen adamdy kirgizbegen. Elde barlyǵy 204 055 adamnyń virýs juqtyrǵany rastalǵan. Al 16 aqpan kúni koronavirýs infektsiiasymen 796 naýqas tirkelgen.
Qazaqstan úkimeti PTR testi teris nátije kórsetken, biraq aýrý belgileri boiynsha koronavirýsqa uqsaityn pnevmoniianyń esebin 1 tamyzdan júrgize bastaǵan. Sodan beri bul aýrýmen 48 766 adam tirkelip, onyń 604-y qaitys bolǵan.
Úkimet koronavirýs pnevmoniiasynyń esebin jergilikti jáne halyqaralyq sarapshylardyń dabyl qaǵýynan keiin ǵana júrgizdi. Byltyr densaýlyq saqtaý ministrligi 2020 jyldyń 1 qańtarynan 2 tamyzyna deiin elde. 256 myń adamnyń pnevmoniiaǵa shaldyqqanyn, onyń aldyńǵy jylǵydan 3,3 ese kóp kórsetkish ekenin aitqan.
