QR Premer-Ministri Asqar Mamin jańartylǵan quramda Úkimettiń alǵashqy otyrysyn ótkizdi, dep habarlaidy "Ult aqparat".
Jiynda eldegi sanitarlyq-epidemiologiialyq jaǵdai qaraldy, sondai-aq jańa taǵaiyndalǵan ulttyq ekonomika ministri Áset Erǵaliev pen eńbek jáne halyqty áleýmettik qorǵaý ministri Serik Shápkenov memlekettik qyzmetshi retinde ant berdi.
Qazirgi tańda Covid-19 taralý qarqyny boiynsha QR-nyń 6 óńiri «qyzyl aimaqta» tur, atap aitsaq: Aqmola, Atyraý, Qostanai, Pavlodar, Soltústik Qazaqstan oblystary jáne Nur-Sultan qalasy. «Sary aimaqta» — Batys Qazaqstan, Almaty jáne Qaraǵandy oblystary. Respýblika boiynsha virýstyń reprodýktivtik kórsetkishi 1,1-di quraidy. Infektsiialyq tósek oryndardyń júktemesi – 32%, reanimatsiialyq tósek oryndar – 23%.
QazCovid-in otandyq vaktsinasy klinikalyq synaqtardyń III kezeńinen ótýde (aldyn ala tiimdiligi – 96%). «Spýtnik V» vaktsinasynyń sapasyn attestattaý jumystary júrgizilip jatyr. GMP standarty bar vaktsinalar shyǵaratyn biofarmzaýyt salynyp jatyr.
«Búgingi tańdaǵy eń mańyzdy mindet – halyqty jappai vaktsinalaýdy uiymdastyrý», — dedi jiyn barysynda Mamin.
Sondai-aq ol Densaýlyq saqtaý ministrligine ákimdiktermen birlesip, 1 aqpannan bastap meditsinalyq uiymdardyń halyqty «Spýtnik V-men» jappai vaktsinalaýdy bastaýǵa daiyn bolýyn qamtamasyz etýdi tapsyrdy.
«Koronavirýs infektsiiasyna qarsy vaktsina egý sharýasyn jedeldetý maqsatynda kelesi baǵytta jumys júrgizilýde: 2021 jylǵy 19 qańtarda Spýtnik V vaktsinasynyń 20 myń dozasyn ákelý jóninde Qaraǵandy farmkesheni men RF tikelei investitsiia qory kelisimge keledi. 20 qańtarda bul vaktsinalardy «SQ-Farmatsiia» kompaniiasyna arnaiy tártip boiynsha bir ret ákelýge rusqat berý kózdelgen. Osydan keiin halyqtyń buǵan deiin belgilengen toptaryna 1 aqpannan bastap koronavirýs infektsiiasyna qarsy vaktsina salý josparlanýda», - dedi Densaýlyq saqtaý ministri Aleksei Tsoi óz sózinde.
Premer-Ministr óńirlerdiń ákimderine epidemiologiialyq ahýal nasharlaǵan jaǵdaida aldyn ala shekteý sharalarynyń josparyn ázirleýdi, halyq pen biznes sýbektileriniń belgilengen sanitariialyq normalardy qatań saqtaýyn qamtamasyz etýdi, bir apta merzimde infektsiialyq statsionarlar men alǵashqy meditsinalyq-sanitariialyq kómek uiymdarynda jeke qorǵanysh quraldary men koronavirýsqa qarsy dári-dármek qorlaryna tekseris júrgizýdi tapsyrdy.
Ishki ister ministrligine ákimdiktermen birlesip, monitoringtik toptardyń jumysyn kúsheitý, Aqparat ministrligimen birlesip túsindirý jumystaryn kúsheitý tapsyryldy.
Otyrysta Densaýlyq saqtaý ministri Aleksei Tsoi, ishki ister ministri Erlan Turǵymbaev, aqparat jáne qoǵamdyq damý ministri Aida Balaeva, Nur-Sultan qalasynyń ákimi Altai Kólginov, Pavlodar oblysynyń ákimi Ábilqaiyr Sqaqov, Aqmola oblysynyń ákimi Ermek Marjyqpaev, Qostanai oblysynyń ákimi Arhimed Muhambetov, Atyraý oblysynyń ákimi Mahambet Dosmuhambetovter baiandama jasady.
