Kómirsýtekterdi barlaý jáne óndirý quqyǵyna arnalǵan onlain aýktsion 2021 jylǵy 23 sáýirde ótedi, dep habarlaidy "Ult aqparat" Energetika ministrliginiń baspasóz qyzmetine silteme jasap.
«Barlaý jáne óndirý quqyǵyn 15 ýchaske boiynsha ótkizý josparlap otyrǵan elektrondyq aýktsionǵa qatysýǵa ótinimdi 25 naýryzyna deiin elektrondyq aýktsion operatorynyń saityna jiberýge bolady. Saýda-sattyq 23 sáýirde, saǵat 10:00-de bastalyp, 17:00-de aiaqtalady», delingen habarlamada.
Aýktsionnyń onlain transliatsiiasy Energetika ministrliginiń saitynda, sondai-aq vedomstvonyń áleýmettik jelidegi akkaýnttarynda uiymdastyrylady.
Jer qoinaýyn paidalaný quqyǵy beriletin ýchaskelerdiń ataýlarymen vedomstvo saitynda tanysýǵa bolady.
«Aýktsion arqyly jer ýchaskesine menshik quqyǵy emes, belgili bir merzimge jer qoinaýyn paidalaný quqyǵy beriletindigin atap ótý mańyzdy. Bul «Jer qoinaýy jáne jer qoinaýyn paidalaný týraly» kodeksimen retteledi, ýchaskelerdegi kez-kelgen tehnologiialyq protsess tek Energetika ministrligi janyndaǵy Barlaý jáne igerý jónindegi ortalyq komissiianyń maquldaýymen múmkin bolady.
Jer qoinaýyn paidalaný quqyǵyn alǵan investor jergilikti atqarýshy organmen jerdi jaldaý shartyna qol qoiady. Jobalyq qujatty ázirleý aldynda árbir jer qoinaýyn paidalanýshy jergilikti turǵyndardyń qatysýymen qoǵamdyq tyńdaýlar ótkizýge mindetti», delingen habarlama.
Vedomstvonyń málimdeýinshe, aýktsionnan túsken barlyq qarajat memlekettik biýdjetti toltyrady.
