Premer-ministr Álihan Smaiylov Úkimette ótken keńeste halyqty kómirmen qamtamasyz etý boiynsha birqatar tapsyrmalar berdi, - dep habarlaidy "Ult aqparat" primeminister.kz saityna silteme jasap.
Indýstriia jáne infraqurylymdyq damý ministri Qaiyrbek Óskenbaevtyń habarlaýynsha, 2022 jylǵy qańtar-tamyzda elimizde 73,7 million tonna kómir óndirilgen, bul ótken jyldyń sáikes kezeńimen salystyrǵanda 6,2 paiyzǵa kóp. Kómir óndirýshi kásiporyndardyń derekteri boiynsha onyń negizgi razrezderdegi quny ótken jylǵy deńgeide saqtalǵan.
Al satý oryndarynda kómir baǵasynyń ósýine jol bermeý úshin ony úzdiksiz tasymaldaýdy qamtamasyz etý jáne avtomobil kóligimen elden tys jerlerge áketýdi shekteý (6 aiǵa) jóninde sharalar qabyldandy.
Sonymen qatar azamattarǵa yńǵaily bolýy úshin kómirdi tanymal marketpleister men bank qosymshalary arqyly ótkizý joldary pysyqtalyp jatyr. Bul baǵytta elimizdegi eń iri bankterdiń biri Qostanai oblysynda pilottyq jobany iske qosty.
Premer-ministr bul tásil kómir satylatyn oryndarda kezekterdi azaitýǵa múmkindik beretinin atap ótti.
"Bul - tutynýshylarǵa qolaily, óte jaqsy tsifrlyq sheshim. Úiden shyqpai-aq kómirge tapsyrys berýge bolady. Jergilikti jerlerde tiisti túsindirý jumystaryn júrgizý qajet", - dedi Álihan Smaiylov.
Keńes sońynda ol Indýstriia jáne infraqurylymdyq damý ministrligi óńirlerdiń ákimdikterimen birlesip, kómirdi jetkizip berý men bólýdi erekshe baqylaýda ustaýy tiis, al Básekelestikti qorǵaý jáne damytý agenttigi kómirdiń bólshek saýda baǵasynyń negizsiz ósýine jol bermeý jáne faktilerdiń jolyn kesý qajettigin atap ótti.
