Foto: ashyq derekkózden
Otandyq kinematografiia damyp, filmder sany jyldan jylǵa artyp keledi. Alaida sońǵy jyldary shyǵarylyp jatqan filmderdiń basym bóligi komediia janrynda túsirilgen.
Qazaqstanda komediia janryndaǵy kinolar ádette eń kóp kassa jinaidy. Aýqymdy qarajat tapqan filmderdiń úshtiginde komediia janryndaǵy ónimder kóp. Atap aitqanda, prodiýser Nurlan Qoianbaevtyń “Túrkiiadaǵy qazaqsha biznes” filmi 1,185,801,720 teńge tabyspen kósh bastap tur. Al ekinshi orynǵa tanymal vainer Jahan Otarǵalievtiń “Djohan” filmi turaqtap otyr. Onyń kassalyq tabysy 856,167,410 teńgeni quraǵan. Tabysty úshtikti “Kelinjan” filmi túiindep tur. Onyń tabysy 694,231,731 teńgege jetken.
Jyl ótken saiyn Qazaqstanda túsiriletin tolyqmetrajdy filmderdiń sany artyp keledi. Zakon.kz portalynyń dereginshe, 2022 jyly jalpy eseppen 38 film jaryqqa shyqqan. Onyń 27-si komediia janrynda túsirilgen.
| 1 | Túrkiiadaǵy qazaqsha biznes | 1 185 801 720 |
| 2 | Djohan | 856 167 410 |
| 3 | Kelinjan | 694 231 731 |
| 4 | I GO TO SCHOOL | 556 844 180 |
| 5 | Kúshik quda | 544 794 274 |
| 6 | Boidaq kúieý | 551 224 990 |
| 7 | Bisharashki | 533 941 570 |
| 8 | Patsanskaia istoriia | 525 941 180 |
| 9 | Moia bolshaia kazahskaia semia | 325 557 220 |
| 10 | Donor | 317 487 180 |
Derekkóz: zakon.kz
Kinosynshy Álimaqyn Janbolat komediia janryndaǵy filmderdi túsirýdegi basty maqsat – kórermen suranysyna qarai kassa jinaý dep túsindirdi.
“Kino kórermen talǵamyn ǵana kózdep, kórsetilim sanyn kóbeitý maqsatynda túsirilse, ol jerde óner uǵymy joǵalady. Qazirgi tańda ulttyq ideia, biik avtorlyq sheshimder, óner men kino tili degen dúnielerdi kommertsiialyq jobalardan izdeý múmkindigi bolmai tur”, – dedi Janbolat.
AQSh-tyń kino óndirisinde de komediia janrynda kóp kartina shyǵady. Biraq odan ózge janrlar da kende qalmaǵan. Amerikalyq prodiýserlerdiń film túsirýdegi negizgi múddesi onyń tabys tabý múmkindigin anyqtaý bolyp sanalady. Bul jaǵynan olardyń ónerge qaraǵanda biznestik motivi joǵary ekeni kórinedi. Film sátti shyqpai qalsa, onyń jalǵasy túsirilmeidi.
Al eýropalyq kinorejisserler kóbine avtorlyq film túsirýge tyrysady. Dese de, olarda amerikalyq ónim sekildi jappai tanymal bolý yqtimaldyǵy tómen. Sebebi rejisserdiń avtorlyq sheshimderi bizneske qaraǵanda, ónerdi alǵa qoiý esebinen shyǵady.
Rejisser ári stsenarist Qaǵanat Mustafinniń aitýynsha, komediialyq filmderdi túsirý arzan.
“Komediia janrynda film túsirý úshin bar bolǵany bir ne eki lokatsiia jáne bir ne eki úi ǵana kerek. Al tarihi kino bolatyn bolsa, kostiým tigý, rekvizit tabý deitin tustary kóp. Onyń bárin jalǵa alý qymbat. Odan da rejisserlerge komediiany 50,000,000-70,000,000 teńgege túsirip tastaǵan ońai. Ol óz qarajatyn aqtaidy”, – dedi Mustafin.
Ticketon.kz saity apta saiyn eń kóp kassa jinaityn filmderdiń tizimin usynady. Tizimniń joǵary sanatyna byltyrǵy jeltoqsannan beri 46 qazaqstandyq film ilingen. Olardyń basym bóligi – komediia janryndaǵy filmder.
Foto: egemen.kz
Astana turǵyny Aiana Myrzahmet Qazaqstandaǵy filmder janrynyń aiasy tarylyp ketkenin aitty. Onyń oiynsha, otandyq kinematografiiada salmaqty filmder jetkiliksiz.
“Bizde komediialyq filmder óte kóp. Onyń ishinde kelin men ene, áiel men kúieý qarym qatynasy jii qozǵalady. Sonyń saldarynan kelindi qul kórý degen siiaqty taptaýyryndardan aiyryla almai júrmiz”, – deidi Myrzahmet.
Taǵy bir elorda turǵyny Alýa Rysqojaeva bul pikirmen kelispeidi. Onyń oiynsha, komediialyq filmderde ene men kelin arasyndaǵy qarym-qatynasty ázil arqyly kórsetedi.
“Bul másele óte ózekti. Qazirgi qazaq qoǵamynda ene men kelinniń bastary syiyspai qanshama otbasynyń shańyraǵy shaiqalyp jatyr. Sol úshin osyndai taqyryptaǵy filmder kóp bolǵany abzal. Sebebi sol arqyly otbasy músheleri bir-birine túsinistikpen qarap, kózderin ashady”, – dedi Rysqojaeva.
Ulttyq kinony qoldaý memlekettik ortalyǵy basqarma tóraǵasynyń orynbasary Baýyrjan Shókenovtyń aitýynsha, 2022 jylǵa deiin Qazaqstannyń prokat naryǵy 20,000,000,000 teńgeni quraǵan. Ol onyń 40%-y otandyq filmderge tiisili.
Kinosynshy Dana Ámirbek otandyq kinonyń óz deńgeiinde damymai jatqanyn bilikti stsenaristerdiń joqtyǵymen bailanystyrady.
“Janrlyq filmniń túp-negizi – stsenarii. Jazylǵan dúnień áý bastan dramatýrgiialyq turǵyda álsiz bolsa, sońynda táýir dúnie shyǵady dep úmittenýdiń qajeti joq”, – deidi kinosynshy.
Ámirbek qazaqstandyq kinematografiianyń komediia janryna oiysýyn ári filmderdiń sapasyz bolýyn naryqqa túrli ázil-syqaq shoýlar men tanymal tamadalardyń aralasýymen bailanystyrady.
“Tamadalar rejisser atanǵan zamanda ekranymyzdyń toiǵa ainalýyna tańqalýdyń qajeti joq. Árkim óz óresine sai sóilep, oi aitady”, – dedi kinosynshy.
Elimizde QR Mádeniet jáne aqparat ministrligi tapsyrysy boiynsha tarihi filmder de túsiriledi. 2019 jyly shyqqan Aqan Sataevtiń “Tomiris” filmine memleket tarapynan 3 850,000,000 teńge bólingen. Al kassadan túsken tabys shamamen 562,000,000 teńgeni quraǵan.
2022 jyly rejisser Aldiiar Bairaqymov túsirgen “Paralimpiets” filmi kórermenge jol tartty. Film sport, drama janrynda túsirilgen. Kassadan túsken tabys – 44,000,000 teńge.
Rejisser Murat Esjan komediia janryndaǵy filmderdiń kóp bolýyn indýstriia jaǵynan progress sanaidy. Onyń aitýynsha, 5 jyl burynǵy jaǵdaimen salystyrǵanda otandyq filmderdiń sany áldeqaida artqan.
Rejisser filmderdi mazmundyq jaǵynan sapasyz dep esepteitinin aitady. Onyń sózinshe, stsenarister bir-birinen kóshirip, kino daiyndyqsyz túsirile berse, ol kórermenniń talǵamynyń tómendeýine ákeledi.
“Bizde memlekettik tapsyryspen tarihi kinolar, dramalar da túsirilip jatyr. Bul jerdegi másele – olardyń jetkiliksizdigi. Memlekettik qarjylandyrýmen túsirilip jatqan dramalar, arthaýstyq, festivaldyq filmder, tarihi kinolar kóbirek jarnamalanyp, kóbirek úlken ekrandarǵa shyǵýy kerek”, – dedi Esjan MNU Newsroom tilshisine bergen suhbatynda.
Murat Esjan – biylǵy eń kóp kassa jinaǵan filmderdiń biri “Mirjaqyp. Oian, kazaq!” filmniń rejisseri. Film aldymen alty seriiadan turatyn nusqamen ótken jyly shyǵaryldy. Ol YouTube jelisinde qoljetimdi bolsa da, jappai kórile qoimaidy. Biyl úlken ekrandarǵa shyǵarylǵanda, halyq suranysy kúrt artty.
Murat Esjan týyndysy bir aptada 107,067,000 teńge tabys taýyp, kósbasshylardyń birine ainaldy. Bastapqyda “Mirjaqyp. Oian, kazaq!” filmi prokatqa shyqqannan keiin 1 aptadan soń, kinoteatrlardan alynyp tastalǵan bolatyn. Keiinnen kórermenniń talaby boiynsha keri kórsetile bastady.
Foto: ticketon.kz
Chaplin Cinemas kinoteatrlar jelisiniń kommertsiialyq direktory Dmitrii Kirienko ulttyq kinony qoldaý jáne damytý kontent táýekelin bólýdiń uzaq merzimdi saiasatynyń bóligi ekenin aitty. Onyń sózinshe, otandyq kinonyń úlesi turaqty túrde ósip keledi.
“2014 jyly nebári 9 otandyq film jaryqqa shyqty. Onyń jalpy kórsetilimdegi úlesi 7,6% boldy. Al 2017 jyly kórsetkish 10%-ǵa kóterildi. 2018 jyly 16% bolsa, 2020 jyly 32%-dy qurady. Osy jyldyń birinshi jartysynda otandyq kino jalpy kassalyq túsimniń 47,5%-yn qurady. Al biylǵy 11 aidyń ortasha kórsetkishi – 23%,” – dedi Kirienko.
Kinotanýshy Baýbek Nógerbek komediialyq filmderdiń kórermenge jii usynylýynyń keri áseri de baryn aitady.
“Árine, oiyn-saýyq filmderi de bolýy kerek. Biraq kinony óner dep qarastyrsaq, oiyn-saýyq komediialardy óner týyndysy dep aita almaimyz. Bundai filmderdiń kóp bolýy – regress. [Bul] stsenaristerde taqyryp pen ideia tapshylyǵy baryn kórsetedi,” – dedi Nógerbek.
Elorda turǵyny Ermahan Rahman kinoteatrǵa tek miyn sergitý úshin baratynyn jáne filmderdiń kemshiligine asa mán bermeitinin aitty.
“Kino oń maqsatta túsirilse jáne kórermenge paidasyn tigizse boldy. Qalǵandaryna kóńil aýdarmaimyn. Film qaraǵanda onyń jaman tustaryn izdegim kelmeidi. Sondyqtan otandyq komediialarǵa kózqarasym túzý”, – deidi Rahman.
Chaplin Cinemas kompaniiasy dereginshe, komediia – joǵary suranysqa ie, prokatqa beriletin eń uzaq jarlardyń biri. Qazaqstandyq dramalar men ekshn-filmderge suranys tómen. Olar kóp jaǵdaida bir aptadan eki aptaǵa deiin kórermenge usynylady.
Sandýǵash Fazyl,
