Qolma-qol aqshasyz tólemder kólemi ótken jylmen salystyrǵanda 2,7 esege artyp, aiyna 1,6 trln teńgeni qurady, dep habarlaidy finprom.kz saity.
Qazaqstanda tólem kartochkalaryn qoldaný arqyly taýarlar men qyzmetterge aqy tóleýge arnalǵan infraqurylym jaqsy damyǵan. Banktik qyzmetterdi tsifrlandyrýdyń ósýimen halyqtyń onlain tólemderine qyzyǵýshylyǵy da edáýir artqan. Qolma-qol aqshasyz tólemder qarqyndy ósýde. Biyl qańtar aiynda ol 1,6 trln teńgeni qurady. Bul ótken jyldyń sáikes kezeńimen salystyrǵanda, 2,7 ese kóp.
Aita ketý kerek, osy jyldyń qańtar aiynda qolma-qol jasalmaityn tólemder somasy 2016 jyldyń 12 aiynyń mólsherinen asyp tústi.
Jalpy, 2019 jyly eldegi qolma-qol aqshasyz tólemder kólemi 2,4 ese ósip, 13,3 trln teńgeni qurady. 2018 jyly bul kórsetkish 5,5 trln teńge bolǵan. Qazaqstan Respýblikasy Ulttyq bankiniń málimeti boiynsha, 2019 jyly 96,4 myń kásipker 134,5 myń saýda núktelerine 161,7 myń POS-terminal ornatqan. 2018 jylǵy kórsetkishtermen salystyrǵanda kásipkerler sany 17%, saýda oryndarynyń sany 22%, POS-terminaldar sany birden 27% óskeni baiqalady.
Aǵymdaǵy jyldyń qańtar aiynda qolma-qol jasalmaityn tólemderdiń eń kóp mólsheri internet jáne uialy telefon arqyly júzege asyrylǵan: ol 1,2 trln teńge nemese jalpy kólemniń 74,3%-y. Bul rette jyl ishinde jasalǵan tólemder 3,3 eseden astam ósti. Internet jáne uialy telefon arqyly jasalǵan bir operatsiianyń ortasha somasy 15,7 myń teńgeni quraidy.
POS-terminaldar arqyly júrgizilgen qolma-qol aqshasyz tólemder somasy 2019 jyldyń sáikes kezeńimen salystyrǵanda 81,2% ósip, 392.3 mlrd teńgeni qurady. Bankomattar arqyly qolma-qol aqshasyz tólemder somasy jylyna 3,8% -ǵa tómendep, 14.9 trln teńgeni qurady.
