Túriktiń Iskefe Holding kompaniiasy Qazaqstanda maly terisin óńdeýge jáne jelatin óndirý zaýytyn salýǵa 27 million AQSh dollaryn investitsiialaidy, - dep habarlaidy "Ult aqparat" AShM baspasóz qyzmetine silteme jasap.
QR aýyl sharýashylyǵy ministri Erbol Qarashókeevtiń jaqynda prezidenttik delegatsiia quramynda Túrkiiaǵa jasaǵan sapary barysynda Qazaqstan Respýblikasynyń Aýyl sharýashylyǵy ministrligi men Iskefe Holding kompaniiasy arasynda ózara túsinistik týraly memorandýmǵa qol qoiyldy.
Taraptar Almatyda jelatin óndirý zaýytyn salýdy investitsiialaýǵa kelisti. Josparlanǵan investitsiia kólemi 27 million dollar. Jobany iske asyrý merzimi 2022-2023 jyl dep josparlanyp otyr.
Joba aiasynda 100-den astam jańa jumys orny ashylady. Kásiporyn indýstriialyq aimaǵynda iske qosylady, al shikizat retinde iri qara mal terisi paidalanylady.
"Zaýyt qurylysy biyl bastalyp, 2023 jyly paidalanýǵa beriledi dep boljanyp otyr, óndiris qýaty jylyna 7000 tonna jelatin.
Elimizde terini bastapqy óńdeý boiynsha 9 kásiporyn jumys isteidi. Biraq, óńdeýshi kásiporyndar aýyl sharýashylyǵy taýaryn óndirýshilerge IQM óńdelmegen terilerin satyp alý úshin básekege qabiletti baǵa usyna almaýda. Usaq jáne jeke qosalqy sharýashylyqtar janýarlardyń terisin qoqysqa tastaidy, al bul óz kezeginde asa qaýipti aýrýlardyń taralý qaýpin týdyrady. 7000 tonna jelatindi óńdeý úshin shamamen 38 myń tonnaǵa jýyq shikizat (teri) qajet", - delingen habarlamada.
Aita keteiik, túrik holdinginiń qurylymyna terini óńdeitin, jelatin, protein, gidrolizat, janýarlardan alynatyn suiyq aminqyshqyldaryn óndiretin 7 zaýyt, sondai-aq ǵylymi-zertteý ortalyǵy men synaq zerthanalary kiredi. Búginde Iskefe Holding bylǵary salasyndaǵy integratsiialanǵan iri óndirýshi, onyń úlesine Eýropa men Aziiadaǵy ótkizý naryqtarymen siyr jelatinine álemdik qajettiliktiń 6 paiyzy tiesili.
