QR Parlamenti Májilisiniń depýtaty Aidos Sarym sońǵy ýaqytta elimizde jii talqylanyp jatqan kiberbýllingke qatysty óz oiyn bildirdi, dep habarlaidy QazAqparat.
«BAQ týraly zańdy usynǵaly birneshe suhbat berdim. Ol zańda birneshe másele qamtylǵan. Onyń ishinde dál qazir jii talqylanyp jatqany tek kiberbýlling máselesi. Sonymen qatar áleýmettik jelige qatysty tusy. Bul meniń túsinigimshe, jýrnalistik qaýymnyń taiazdyǵyn kórsetedi. Shyndyǵyn aitsaq, bizdiń balalarymyzdyń taǵdyry, onyń ishinde psihologiialyq, áleýmettik jaǵy kóbin qyzyqtyrmaidy. Esesine áleýmettik jeli jumysynyń erkindigi bárine qyzyqty. Menińshe, bul haip taqyryp. Óitkeni, Úkimet áleýmettik jelini rasymen buǵattaǵysy kelse, osy zańsyz-aq, buǵan deiin qabyldanǵan zańnyń 41-shi babyna sai kez kelgen áleýmettik jelini tolyq túrde buǵattaýǵa múmkindigi bar», - dedi Aidos Sarym elimizge tanymal jýrnalist Búbigúl Jeksenbaiǵa bergen suhbatynda.
Halyq qalaýlysynyń aitýynsha, BAQ týraly zań qabyldanǵan soń salaǵa qatysty máseleler óz ornyna qoiylady.
«Zańdy talqylaýda birinshi oqylymǵa deiin sonshalyqty másele týyndamaǵan. Onyń taǵdyryna eshkim asa mán de bermedi. Úkimettiń qorytyndysymen qaityp kelip, ekinshi oqylymda qabyldanǵan kezde keibir adamdar úshin piar jasaýdyń múmkindigin berdi. Ainalyp kelgende bul zańda jurt qorqatyndai, úrketindei eshteńe joq. Kerisinshe, óte mańyzdy mektep baǵdarlamasy, oqýlyqqa qatysty dúnieler aitylǵan», - deidi ol.
