Túrkiia Qazaqstanǵa keme jasaý zaýytyn salýǵa kómektesýge daiyn. Bul týraly Aqordada ótip jatqan Qazaqstan men Túrkiia arasyndaǵy joǵary deńgeidegi strategiialyq yntymaqtastyq keńesiniń 4-shi otyrysynda Túrkiia Prezidenti Rejep Taiip Erdoǵan aitty, dep habarlaidy QazAqparat.
«Jańa ǵana ótken ońasha kezdesýde qarym-qatynasymyzdyń barlyq aspektisi, aimaqtyq jáne jahandyq máseleler boiynsha pikir almastyq. Yntymaqtastyǵymyzdy barlyq salada odan ary nyǵaitýǵa kelistik. Qazaqstandaǵy investitsiiamyzdy qomaqty deńgeige kóterip, 4,35 mlrd dollarǵa jetkizdik. Túrkiia basqa elderge qaraǵanda tek energetika salasyna ǵana mán berip qoimai, Qazaqstan ekonomikasyn ártaraptandyrýǵa jáne jumyspen qamtýdy arttyrýǵa kómektesip otyr. Jumys oryndaryn ashýǵa kóbirek úles qosqysy keletin kompaniialarymyzǵa qoldaý bildiretindigińizge senimdimin», - dedi Túrkiia Prezidenti.
Túrkiia basshysy eki eldiń saýda ainalymyn qysqa merzimde 5 mlrd dollarǵa, al uzaq merzimde 10 mlrd dollarǵa jetkizý maqsaty turǵanyn atap ótti.
Sonymen qatar ol byltyr 58 paiyzdyq ósimmen bastapqy meje eńserilgenin, iaǵni saýda-sattyq 5 mlrd dollarǵa jetkenin aitty.
«Qazaqstannyń Kaspii teńizindegi kólik flotyn kúsheitý jáne túrli ereksheliktegi kemelerdi shyǵarý maqsatynda keme jasaý zaýytyn salýǵa kómektesýge de daiynbyz», - dedi Rejep Taiip Erdoǵan.
