Elimizde sertifikattalmaǵan ónimdi tolyq baqylaýǵa alý múmkindigi jasalady. Bul týraly Parlament Májilisiniń jalpy otyrysynda «Tehnikalyq retteý týraly» zańynyń jobasyn birinshi oqylymda talqylaý kezinde QR Saýda jáne integratsiia ministri Baqyt Sultanov málim etti, dep habarlaidy QazAqparat.
«Zań jobasynyń negizgi erejelerin qysqasha atap ótýge ruqsat etińizder.
Birinshiden, ishki naryqty «tazartý» eskerilgen. Bul máseledegi zańnamalyq jańalyǵy – sýbektilerdiń baqylaýynan obektilerdiń baqylaýyna kóshý. Iaǵni óndirýshi nemese satýshy emes, ónimniń ózi tekseriletin bolady. Ol úshin zerthanalarda synaq júrgizý úshin adam ómirine qaýipti ónim úlgilerin satyp alý rásimderi engiziledi. Synaq nátijelerimen dáleldengen qaýipti ónimdi ńaryqtyń ainalymynan jedel túrde shyǵaryp alý maqsatynda naryqty qadaǵalaý institýty engizilýde. Bul jappai baqylaýdy bildirmeidi. Obektiler aqparattyq bazada «onlain» rejimde qadaǵalanatyn bolady, al tekserýler tek «anyqtaý - synaý – naryqtan alý» shemasy boiynsha júzege asyrylady», - dedi ministr.
Ekinshiden, sáikestikti baǵalaý rásimderin jetildirý, sertifikattaý jáne akkreditteý protsesterin tsifrlandyrý qaralǵan.
«Ol úshin elektrondyq sertifikattarǵa kóshý, keiinnen Eýraziialyq ekonomikalyq komissiianyń ortaq protsesterimen integratsiialaý qarastyrylǵan. Sáikestikti baǵalaýǵa óndirýshi, óndirýshiniń ýákiletti tulǵasy, importtaýshy, satýshy degen ótinish berýishilerdiń naqty tizimi bekitiledi. Sertifikat «iesiniń» jáne «paidalanýshysynyń» quqyǵy týraly maǵynasy engiziledi. Synaq protsesiniń foto-beine tirkeý mehanizmi kózdeledi jáne synaq bazasynyń bolýyna qoiylatyn talaptar belgilenedi.
Atalǵan sharalardy qabyldaý nátijesinde sertifikattaý kezinde synaq nátijeleriniń durystyǵyn 100 paiyzǵa deiin jetkizý kútilýde jáne sertifikattalmaǵan ónimdi tolyq baqylaýǵa alý múmkindik beriledi», - dedi B. Sultanov.
