Memleket basshysy Qasym-Jomart Toqaevtyń Qazaqstan Respýblikasynyń memlekettik basqarý júiesin odan ári jetildirý jónindegi sharalar týraly Jarlyǵy shyqty.
***
Qazaqstan Respýblikasy Konstitýtsiiasynyń 44-babynyń 5) tarmaqshasyna sáikes kóleńkeli ekonomikaǵa qarsy is-qimyldyń tiimdiligin arttyrý maqsatynda QAÝLY ETEMIN:
1. Qazaqstan Respýblikasynyń Prezidentine tikelei baǵynatyn jáne esep beretin memlekettik organ retinde Qazaqstan Respýblikasynyń Qarjylyq monitoring agenttigi (budan ári – Agenttik) qurylsyn, oǵan Qazaqstan Respýblikasy Qarjy ministrliginiń qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy is-qimyl salasyndaǵy, sondai-aq ekonomikalyq jáne qarjylyq qylmystar men quqyq buzýshylyqtardyń aldyn alý, olardy anyqtaý, jolyn kesý, ashý jáne tergep-tekserý boiynsha fýnktsiialary men ókilettikteri berilsin.
2. Agenttik beriletin fýnktsiialar men ókilettikter sheńberinde Qazaqstan Respýblikasy Qarjy ministrliginiń quqyqtary men ókilettikteriniń quqyqtyq mirasqory bolyp aiqyndalsyn.
3. «Qazaqstan Respýblikasy Prezidentiniń Ákimshiligi týraly erejeni bekitý týraly» Qazaqstan Respýblikasy Prezidentiniń 2008 jylǵy 11 naýryzdaǵy № 552 Jarlyǵyna (Qazaqstan Respýblikasynyń PÚAJ-y, 2008 j., № 12-13, 116-qujat) mynadai tolyqtyrý engizilsin: joǵaryda atalǵan Jarlyqpen bekitilgen Qazaqstan Respýblikasynyń Prezidentine tikelei baǵynatyn jáne esep beretin memlekettik organdardyń tizbesi mynadai mazmundaǵy jolmen tolyqtyrylsyn: «Qazaqstan Respýblikasynyń Qarjylyq monitoring agenttigi».
4. Qazaqstan Respýblikasy Prezidentiniń Ákimshiligi:
1) Qazaqstan Respýblikasy Prezidentiniń qaraýyna: Agenttik tóraǵasymen birlesip, Agenttik jáne onyń qurylymy týraly ereje jobalaryn; Qazaqstan Respýblikasynyń Úkimetimen birlesip, Qazaqstan Respýblikasy Qarjy ministrliginiń jáne tiisti vedomstvolyq baǵynystaǵy uiymnyń shtat sanyn Agenttikke qaita bólý jóninde usynystar engizsin;
2) osy Jarlyqty iske asyrý boiynsha ózge de sharalardy qabyldasyn.
5. Qazaqstan Respýblikasynyń Úkimeti:
1) Qazaqstan Respýblikasy Prezidentiniń Ákimshiligimen kelisý boiynsha Qazaqstan Respýblikasy Qarjy ministrliginiń jáne tiisti vedomstvolyq baǵynystaǵy uiymnyń shtat sanyn qaita bólýdi;
2) osy Jarlyqty iske asyrý boiynsha ózge de sharalardy qabyldaýdy qamtamasyz etsin.
6. Osy Jarlyqtyń oryndalýyn baqylaý Qazaqstan Respýblikasy Prezidentiniń Ákimshiligine júktelsin.
7. Osy Jarlyq qol qoiylǵan kúninen bastap qoldanysqa engiziledi.
Qazaqstan Respýblikasynyń Prezidenti Q.Toqaev
Nur-Sultan, Aqorda, 2021 jylǵy 28 qańtar
№ 501
