Bizde qarjy rezervi jetkilikti jáne memleket qaryzynyń kólemi múmkindigimizge orailas.
Bul týraly Memleket basshysy Qasym-Jomart Toqaev Tótenshe jaǵdai rejimin qamtamasyz etý jónindegi memlekettik komissiianyń otyrysynda málim etti, dep habarlaidy "Ult aqparat".
«Jumys barysynda olqylyqtardyń bolǵanyn da moiyndaýymyz kerek. Indet kóp taralyp, ekonomikalyq máseleler qatty ýshyǵyp ketkeni ras. Soǵan qarai, biz der kezinde shuǵyl sharalar qabyldadyq. Kóptegen másele qoǵam ókilderiniń belsene qatysýy arqyly sheshildi. Bul «Halyq únine qulaq asatyn memleket» tujyrymdamasyn júzege asyrýdyń mańyzdy kezeńine ainaldy. Koronavirýs pandemiiasy álemdik retsessiianyń bastalýyna sebep boldy. Tipti uzaqqa sozylatyn ekonomikalyq daǵdarysqa da alyp kelýi ábden múmkin», - dedi Memleket basshysy.
Prezidenttik atap ótýinshe, álemdegi eńbekke jaramdy halyqtyń jartysyna jýyǵynyń tabysy azaidy.
«Jer-jerde protektsionizmniń kúsheiýi beleń alýda. Ekonomikanyń tutas salalary toqyraýǵa ushyrap jatyr. 400 millionnan astam kásiporyn bankrot bolýdyń aldynda tur. Álemdegi eńbekke jaramdy halyqtyń jartysyna jýyǵynyń tabysy azaidy. Sarapshylar jahan ekonomikasy sońǵy júz jyl ishinde bolmaǵan deńgeige túsetinin boljap otyr. Osyndai jaǵdaiǵa qaramastan, elimiz birqatar basymdyqqa ie bolyp otyrǵanyn aitqym keledi. Bizde qarjy rezervi jetkilikti jáne memleket qaryzynyń kólemi múmkindigimizge orailas. Eń bastysy, biz jańa ahýal jaǵdaiynda jumyspen qamtamasyz etý jáne ekonomikalyq tiimdilikti arttyrý úshin resýrstardy qaida jumsaý kerektigin bilemiz. Eń bastysy, barsha azamattardyń ómiri men densaýlyǵyn saqtaý. Azamattardyń tabysyn arttyrý. Biznesti qoldaý jáne ony damytý. Bilim jáne ǵylym júiesin jetildirý», - dedi Qasym-Jomart Toqaev.
