Qazirgi ýaqytta Qazaqstanda 19 taýar birjasy litsenziialanǵan. Bul týraly Májilistiń jalpy otyrysynda birjalyq saýdany damytý jáne jetildirý máseleleri boiynsha zań jobasyn talqylaý kezinde Saýda jáne integratsiia ministri Baqyt Sultanov málim etti, dep habarlaidy QazAqparat.
«Usynylyp otyrǵan Zań jobasynyń negizgi bólimderine toqtalyp keteiin. Qazirgi ýaqytta Qazaqstanda 19 taýar birjasy litsenziialanǵan. Ulttyq statistika biýrosynyń derekterine sáikes birjalyq kelisimderdiń sany 2009 jyly 1 119-dan 2020 jyly 48 000 kelisimge deiin, iaǵni 50 esege ósti. Bul rette, jetekshi úsh taýar birjasynyń («Astana», ETS, «Kaspi» birjalary) birjalyq saýda-sattyq kólemi 2020 jyly 291,2 mlrd teńgeni, iaǵni barlyq saýda-sattyq kóleminiń 30%-yn qurady. Turaqty birjalyq salany qalyptastyrý maqsatynda zań jobasynda taýar birjalarynyń eki deńgeili júiesin engizý usynylady», - dedi Baqyt Sultanov.
Ministr birinshi deńgeige toqtala kele, saýda-sattyqty birjalyq taýarlarmen júzege asyratyn taýar birjalary úshin jarǵylyq kapitaldy 700 myń eselengen ailyq eseptik kórsetkishke deiin ulǵaitý kózdelgenin aitty.
«Ekinshi deńgei, standarttalmaǵan taýarlarmen ǵana saýda-sattyqty júzege asyratyn taýar birjalary úshin talaptar burynǵy deńgeide qalady. Iaǵni jarǵylyq kapitaldyń eń az mólsheri 300 myń eselengen ailyq eseptik kórsetkishti quraidy. Birjalardyń túrli-tarmaqtaryna bólinýi birjalyq saýdany jetildirýge jáne damytýǵa serpin beredi. Iaǵni tek standarttalmaǵan taýarlarmen saýda-sattyqty júzege asyratyn birjalar basqa qatysýshylarmen shoǵyrlanyp, qyzmetter spektrin keńeitip, olardyń sapasyn jaqsartý jáne kólemin ulǵaitý arqyly óz potentsialyn arttyrýǵa tyrysady», - dedi B. Sultanov.
