Elimizde 62 myńnan astam stýdent jataqhanaǵa zárý. Onyń 20 myńy Almatyda. Bul týraly onlain brifing barysynda QR Bilim jáne ǵylym ministrligi «Qarjy ortalyǵy» AQ ilgeriletý jáne syrtqy kommýnikatsiialar departamentiniń direktory Alpamys Satybaldin málim etti, dep habarlaidy QazAqparat.
«Qazaqstanda 62 myń stýdent jataqhanaǵa muqtaj. Onyń 20 myńy - almatylyq stýdentter. Óitkeni, JOO-nyń 40 paiyzy osy megapoliste ornalasqan», - deidi spiker.
Sonymen qatar, ol byltyr kásipkerler óz qarajatyna Almatyda 1272 orynǵa segiz jataqhana salǵanyn aitty.
«Megapoliste tek jeke kásipkerlerdiń esebinen 8 jataqhana salyndy. Biyl Almatyda birneshe joba iske qosyldy. Iri qurylys kompaniialarymen kelissóz júrip jatyr. Eger ýniversitet pen investor arasyndaǵy barlyq kelissóz sátti aiaqtalsa, onda bir ǵana ýniversitetke 15-ke jýyq jańa nysan salý josparlanǵan. Basqa ýniversitetter de qatysady», - dedi ol.
Alpamys Satybaldin Qazaqstanda jer telimi bar, biraq qurylysqa qajet qarajaty joq joǵary oqý oryndarynyń bar ekenin tilge tiek etti.
«Sodan keiin investor men ýniversitet arasynda yntymaqtastyq bar, olar konsortsiýmdyq kelisim jasaidy. Investordyń aqshasy, ýniversitettiń jeri. Ortaq úlestik menshik qurylýda, ol sharttyq qatynastarmen retteledi. Bul rette biz de qarjylandyramyz», - dedi Satybaldin.
Spiker elimizde MJÁ tetigi boiynsha jataqhanalar áli salynbaǵanyn atap ótti.
