Parlament Májilisiniń jalpy otyrysynda Ulttyq ekonomika ministri Rýslan Dálenov investitsiialyq salyq kreditin engizý usynysyn aitty, dep habarlaidy QazAqparat.
Búgin jalpy otyrysta «Qazaqstan Respýblikasynyń keibir zańnamalyq aktilerine salyq salý jáne investitsiialyq ahýaldy jetildirý máseleleri boiynsha ózgerister men tolyqtyrýlar engizý týraly» zańynyń jobasy talqylanyp jatyr.
«Investitsiialyq salyq kreditin engizý usynylady. Kredit korporativtik tabys salyǵy jáne múlik salyǵy boiynsha 3 jylǵa beriledi. Ol paiyzsyz bolady, biraq sharttar oryndalmaǵan jaǵdaida ósimpul esepteledi», - dedi ministr.
Onyń sózine qaraǵanda, maqtany qaita óńdeýge, ashytqy, konditerlik ónimder, qant qyzylshasynan qantty óndirýge eseptelgen qosylǵan qun salyǵyn azaitý boiynsha normany qoldaný usynylady. Bul aýyl sharýashylyǵy ónimderin qaita óńdeýdi, óndiris kólemin ulǵaitýdy yntalandyratyn bolady.
«Eksport kezinde qosylǵan qun salyǵyn qaitarý rásimin ońailatý maqsatynda otandyq óndirýshiler úshin qosylǵan qun salyǵyn jeńildetilgen túrde qaitarý quqyǵyn berý usynylady: iaǵni tekserýsiz – 50%, qalǵan 50% - tekserýden keiin», - dedi R. Dálenov.
Budan bólek, kólik quraldary men aýyl sharýashylyǵy tehnikasynyń komponentterin óndirý úshin qosylǵan qun salyǵy boiynsha jeńildikti qoldaný usynylady. Bul otandyq avtokólikterdegi qazaqstandyq qamtý úlesin arttyrady.
