2020 jyldyń sońyna qarai Qazaqstanda et óndirý kólemi tutyný deńgeiine deiin jetkizildi. Qazir naryqta kópten kútken et ónimderine suranys pen usynystyń tepe-teńdigi qalyptasty, dep habarlaidy "Ult aqparat".
Aýyl sharýashylyǵy ministrliginiń málimetinshe, ótken jyly respýblikada 931,4 myń tonna et ( 2019 jylǵa qaraǵanda 3,7% artyq ), onyń ishinde 521,3 myń tonna siyr eti, 172,3 myń tonna qoi eti jáne 143 myń tonnaǵa jýyq jylqy eti óndirildi.
Osylaisha, qazirgi ýaqytta otandyq óndiris esebinen ishki naryq siyr etimen – 97%-ǵa, qoi etimen – 100%, jylqy etimen – 98%-ǵa qamtamasyz etilgen.
Búginde respýblika boiynsha siyr etiniń qory – 16,5 myń tonnany, qoi etiniń qory – 7,8 myń tonnany, jylqy etiniń qory – 7,3 myń tonnany quraidy.
Óńirlerdegi qoimalar únemi tolyqtyrylyp otyrady, sondyqtan elimizde et tapshylyǵy kútilmeidi.
Sondai-aq, Qazaqstanda mal sany jetkilikti. Elimizde mal basy jyl saiyn turaqty ósimdi kórsetýde.
Buǵan mal ósirýshilerge degen memlekettik qoldaý sharalarynyń artýy, sondai-aq ótken jyly QR Aýyl sharýashylyǵy ministrligi tiri maldy eksporttaýǵa engizgen moratorii yqpal etti.
2020 jyly sharýashylyqtardyń barlyq sanattarynda jylqy sany 9,3%-ǵa ( 3 mln 118,3 myń basqa deiin ), IQM – 5,5%-ǵa ( 7 mln 848,5 myńǵa deiin ), túie – 5%-ǵa ( 227,2 myńǵa deiin ), shoshqa – 0,8%-ǵa ( 819,9 myńǵa deiin ), qoi – 4,9%-ǵa ( 17,7 mln-ǵa deiin ), eshki – 2,8%-ǵa ( 2 mln 305,6 myńǵa deiin ) ulǵaidy.
Osyǵan bailanysty et baǵasynyń ósýi óndiristiń nemese mal basynyń jetispeýshiligine bailanysty emes.
Naryqtyq ekonomika jaǵdaiynda aýyl sharýashylyǵy ónimine jáne taýarlardyń basqa túrlerine baǵany kásipkerler óndiris, saqtaý, tasymaldaý kezinde jumsaǵan shyǵyndardy eskere otyryp, suranys pen usynys negizinde derbes belgileitinin atap ótý qajet.
Sonymen qatar, baǵaǵa syrtqy faktor – kórshi elder men halyqaralyq naryqtardaǵy uqsas ónimder baǵasynyń ózgerýi de áser etedi.
