Saýda jáne integratsiialar ministri Baqyt Sultanov et ónimderin eksporttaý kórsetkishterin baiandady, dep habarlaidy QazAqparat.
«2020 jyly iri qara mal eti 9 mln dollarǵa eksporttaldy, jalpy kólemi – 2,7 myń tonna. Jyl basynan bergi 4 aida eksport kólemi 9,4 mln dollarǵa 2,6 myń tonna etti qurady. Import kólemi byltyr 4 aida 35 mln dollar bolsa, biyl 21 mln dollardy quraǵan, iaǵni 41% tómendedi. Bul kórsetkishter eksport kólemi artyp, import kólemi azaiyp jatqanyn kórsetedi», - dedi Saýda ministri Ortalyq kommýnikatsiialar qyzmetinde ótken baspasóz máslihatynda.
Sonymen birge, ministr «Qýańshylyqtan keiin kúzde et tapshylyǵy bolmaýy úshin ministrlik ne istep jatyr?» degen suraqqa jaýap berdi.
«Árine, et bolsyn, basqa ónim bolsyn, óndirý kólemi eń birinshi óz halqymyzdy qamtamasyz etýi kerek. Ári qarai eksportqa múmkindik bolsa, ony da qoldaýymyz kerek. Óitkeni, bul valiýtalyq kiris bolady, sharýalarǵa, fermerlerge jaqsy tabys alyp keledi. Óz elimizde et kólemi nemese basqa da taýar tapshylyǵy bolsa, eksportty shekteitin arnaiy instrýment qarastyrylǵan. Ol úshin vedomstvoaralyq komissiia qurylǵan, olar tapshylyq baiqalǵan kezde tiisti sheshim qabyldaityn bolady», - dep túsindirdi Sultanov.
