Qazaqstanda esirtkini beimeditsinalyq maqsatta qoldanǵany úshin jazany jeńildetý josparlanýda. Bul týraly QR IIM Esirtki qylmysyna qarsy is-qimyl departamentiniń basqarma bastyǵy Baqytjan Ámirhanov aityp berdi, dep habarlaidy QazAqparat.
«Esirtkini beimeditsinalyq maqsatta qoldanǵany úshin jazany jeńildetýdi kózdeitin eki zań jobasy ázirlendi. Iaǵni, esirtkini az mólsherde qoldanǵan jáne saqtaǵan adamdar qylmystyq emes, ákimshilik jaýapkershilikke tartylady», - dedi Baqytjan Ámirhanov ministrlik uiymdastyrǵan onlain-brifing barysynda.
Spikerdiń aitýynsha, zań jobasy prekýrsorlar men qatty áser etetin zattardyń zańsyz ainalymy úshin jaýapkershilikti kúsheitýdi kózdeidi.
Sonymen birge, sintetikalyq esirtkiniń taralýyna qarsy is-qimyl máselelerin eldiń joǵary basshylyǵy memlekettik basqarý organdarynyń basym mindetteriniń biri retinde aiqyndaǵan. Búgingi tańda 2022-2023 jyldarǵa arnalǵan Jol kartasy ázirlendi, onda shetelde óndirilgen esirtkilerdiń túsýine, olardyń el ishinde taralýyna jáne óndirilýine jol bermeý, esirtkige táýeldilerdi emdeý jáne ońaltý, sondai-aq ishki ister, densaýlyq saqtaý, sot saraptamasy organdaryn jáne shekaralyq ótkizý pýnktterin materialdyq-tehnikalyq jaraqtandyrý sharalary kózdelgen.
Asa qaýipti bolyp snalatyn mefedronnyń, pirovaleronnyń jáne olardyń analogtarynyń, sintetikalyq kannabinoidtardyń «kriminaldyq» mólsheri 50 gramnan 1 gramǵa deiin zań júzinde tómendetildi. Olardy ótkizý maqsatynsyz saqtaǵany úshin qylmystyq jaýapkershilik kúsheitilgen.
