Foto: Aqorda
Memleket basshysy Túrkistan qalasynda jańadan boi kótergen «Dostyq úiiniń» jumysymen tanysty. Bul týraly Aqorda habarlady.
Qasym-Jomart Toqaevtyń arnaiy tapsyrmasymen salynǵan keshende «Qoǵamdyq kelisim» mekemesi, oblystyq Qazaqstan halqy assambleiasy janyndaǵy Ardagerler keńesi, Analar keńesi, Mediatsiia keńesi, sondai-aq aimaqtaǵy 11 etnomádeni birlestiktiń ókildikteri ornalasqan.
Memleket basshysy ǵimaratty aralap kórip, jergilikti ziialy qaýymmen jáne Qazaqstan halqy assambleiasynyń múshelerimen júzdesti.
"Qasterli Túrkistan jerine arnaiy kelip otyrmyn. Túrkistan óńiriniń keleshegi jarqyn dep oilaimyn. Jastarymyzǵa úlgi-ónege kórsetip júrgen ardagerlerge alǵys aitqym keledi. Eń aldymen, jastarǵa qoldaý bildirýimiz kerek. Biz bárimiz birigip, el úshin eńbek etýimiz qajet. Syrttan keletin táýekelder az emes. Ahýaldy jaqsy bilesizder. Túrkistan oblysynda 50 ult ókili turady. Aýyzbirshilikti saqtaý jáne elimizdi damytý jolyndaǵy eren eńbekterińizge rizashylyq bildiremin. Qazaqstanda eshqashan eshqandai fobiia bolǵan emes, bolmaidy da. Biz – birligi myǵym, tolerantty, ustamdy ári eńbekqor halyqpyz. Eń bastysy – osy. Sondyqtan yntymaǵy jarasqan qoǵamnyń irgesin áli de bekite túsemiz", - dedi Qasym-Jomart Toqaev.
Memleket basshysy Túrkistannyń kórikti, taza qalaǵa ainalǵanyna nazar aýdardy. Bul rette Túrkistanǵa oblys mártebesin bergen elimizdiń Tuńǵysh prezidenti Nursultan Nazarbaevtyń eńbegi zor ekenin atap ótti.
Kezdesýde Aqsaqaldar keńesiniń tóraǵasy Sozaqbai Ábdiqulov Túrkistannyń oblysqa ainalǵan sátinen beri oryn alǵan oń ózgeristerge toqtalyp, halyq sany tyǵyz ornalasqan óńirge memleket tarapynan jasalyp jatqan qamqorlyq úshin alǵys aitty.
