Qazaqstandaǵy otbasylardyń arasynda balanyń 1 jasqa deiingi kútimine bailanysty áleýmettik tólem rásimdeitin erkekter sany artyp keledi, dep habarlaidy QazAqparat.
«2016 jyly atalǵan áleýmettik tólem alýshylardyń jalpy sanynyń 98 paiyzyn áielder, tek 2 paiyzyn erkekter quraǵan bolatyn. Al 2017 jyly 1 jasqa deiingi balanyń kútimine bailanysty kirisinen aiyrylǵan jaǵdaida áleýmettik tólem alýǵa ótinim bergenderdiń jalpy sanynyń 8 paiyzyn erkekter qurady», - delingen QR Eńbek jáne halyqty áleýmettik qorǵaý ministrliginiń resmi saýalǵa bergen jaýabynda.
Astana qalasynyń turǵyny Ilzat Safarǵalievtiń aitýynsha, mundai sheshim qabyldaýyna jubaiyna qaraǵanda óziniń jalaqysynyń joǵary bolýy sebep bolǵan.
Aita keterligi, bala dúniege kelgende tólenetin tólemaqynyń birneshe túri bar. Birinshisi, jumys isteitin áielge tiesili dekrettik tólemaqy. Ol bir-aq ret beriledi. Ony esepteýdiń ózindik úlgisi bar. Tabys mólsheri naqty jumys istegen merzimine qaramastan bala týǵanǵa deiingi sońǵy jyldaǵy áleýmettik aýdarymdar boiynsha anyqtalady. Tólem mólsherin sońǵy jyldyń ortasha ailyq tabysyn 10% mólsherindegi zeinetaqy aýdarymdaryn shegerýmen eńbekke jaramsyzdyq kúnderiniń koeffitsientine kóbeitý arqyly bilýge bolady. Ortasha ailyq tabys jyl boiǵy jalpy tabysty 12 aiǵa bólgende anyqtalady. Eńbekke jaramsyzdyq kúnderiniń koeffitsienti júktiligi jáne bosanýyna bailanysty demalys kúnderiniń sanyn 30 kúnge bólýmen anyqtalady. Sol sebepti maksimaldy koeffitsient 126/30=4,2 teńeledi.
Bala týǵandaǵy birjolǵy jórgekpul mólsheri zańmen bekitilgen. Birinshi, ekinshi jáne úshinshi balaǵa - 30 ailyq eseptik kórsetkish (AEK), al, tórtinshi, besinshi, altynshy jáne t.b. balalarǵa - 50 AEK tólenýge tiis.
Al, sol balanyń bir jasqa deiingi kútimi úshin ai saiynǵy járdemaqyny alýǵa sábidiń anasy nemese ákesi ótinish bere alady.
Eńbek jáne halyqty áleýmettik qorǵaý ministrliginiń málimetinshe, 2017 jyldyń 9 aiynda Áleýmettik saqtandyrý qorynan júktilik pen bala týǵany úshin 48 mlrd teńge, 1 jasqa deiin bala kútimi úshin 53 mlrd teńge tólengen.
