Qazaqstanda eksporterlerge arnalǵan biryńǵai tsifrlyq tereze paida bolady. Bul týraly OKQ-da ótken baspasóz máslihatynda Saýda jáne integratsiia ministri Baqyt Sultanov málim etti, dep habarlaidy "Ult aqparat".
«10 memlekettik jáne kvazimemlekettik qurylym usynatyn memlekettik qoldaý sharalarynyń bárin de biriktirýdi kózdep otyrmyz. Osylaisha export.gov.kz portaly - Digital Export biryńǵai tsifrlyq terezege ainalady», - dedi Baqyt Sultanov.
Ministr sonymen qatar bul baǵytta Sberbank jáne AlfaBankpen birge eki pilottyq joba bastalyp ketkenin jetkizdi.
«Eksporterler elektrondy túrde ótinim jiberip, shyǵyndaryn ótei alady. Bul baǵyttaǵy jumys shyǵyndy óteý jeńildigin 7 kúnniń ishinde alýǵa kómektesedi. Qazir bul ótinim boiynsha kómek kórsetý 25-30 kúnge deiin sozylady. Ary qarai basqa da bankterdiń qatysýymen qyzmet túrlerin arttyrý kózdelýde», - dedi ol.
