QR Ulttyq banki Almatynyń mamandandyrylǵan aýdanaralyq ekonomikalyq sotyna «Eksimbank Qazaqstan» AQ-ny májbúrlep taratý týraly shaǵym-talap berdi. Bul týraly UB-nyń baspasóz qyzmetinen málim boldy, dep habarlaidy "Ult aqparat".
Atap aitqanda, 2018 jylǵy 28 qarashada Almaty qalasynyń mamandandyrylǵan aýdanaralyq ekonomikalyq soty «Eksimbank Qazaqstan» AQ-ny májbúrlep taratý týraly sheshim qabyldady. Úshinshi tulǵalardyń tarapynan sot aktisine shaǵym bolmaǵan jaǵdaida, túpkilikti formada sheshim shyǵarylǵan kúnnen bastap 30 kún ishinde sheshim zańdy kúshine enedi.
Bankti májbúrlep taratý týraly sot sheshimi zańdy kúshine engen kúni UB banktiń taratý komissiiasyn taǵaiyndaidy.
«Májbúrlep taratý rásiminiń ózi Bankter týraly zańnyń talaptaryna, Qazaqstan Respýblikasynda bankterdi májbúrlep taratý qaǵidalaryna jáne ózge de zańnamalarǵa sáikes júzege asyrylady» delingen habarlamada.
«Eksimbank Qazaqstan» AQ-ny taratý týraly sheshim zańdy kúshine engen kúnnen bastap 14 jumys kúni ishinde QDKQ Qazaqstanda jumys istep turǵan bankterdiń qaisysy Eksimbank Qazaqstan salymshylarymen tólem júrgizý jónindegi agent retinde jumys istep, salymshylarmen esep aiyrysatyndyǵyn habarlaidy.
QDKQ tańdalǵan agent-bankti jariialaǵannan jáne kepildikti ótemaqyny tóleý bastalǵannan keiin, salymshylar osy agent-banktiń filialyna kepildikti ótemaqy tóleýge arnalǵan ótinish jasaǵany durys. Bul rette salymshynyń ózimen birge jeke kýáliginiń nemese tólqujatynyń bolýy jetkilikti. Eger salymshynyń ornyna basqa tulǵa ótinish berse, onda quqyq belgileitin qujattardy (muragerlik týraly kýálik, senimhat, depozitke talap etý quqyǵyn berý týraly shart) usynýy qajet.
Kepildikti ótemaqy tóleý qolma-qol aqshamen nemese salymshynyń basqa banktegi shotyna aýdarymmen ǵana júzege asyrylatyn bolady. Bul rette salymshynyń alynǵan kepildi ótemaqyny agent-banktiń shotynda qaldyrýǵa múmkindigi bar. Barlyq kepildi ótemaqylardy tóleý tek ulttyq valiýta - teńgemen júzege asyrylady. Shetel valiýtasyndaǵy depozitter boiynsha kepildikti ótemaqyny esepteý úshin bankti májbúrlep taratý týraly sot sheshimi zańdy kúshine engen kúni belgilengen valiýtalar aiyrbastaýdyń naryqtyq baǵamy paidalanylady.
Salymshylar depozitterge kepildik berý máseleleri boiynsha qosymsha aqparatty QDKQ saityndaǵy «Salymshylarǵa» bóliminen ala alady.
Budan basqa, salymshylar myna telefondar arqyly: +7 (727) 312 24 37, +7 (727) 312 24 38, +7 (727) 312 24 39 ne 8 8000 80 10 20 shuǵyl jeli nómiri boiynsha habarlasa alady (Qazaqstan boiynsha qońyraý soǵý tegin).
Sonymen birge salymshylar qyzyǵýshylyq tanytatyn máseleleri boiynsha «Eksimbank Qazaqstan» AQ-tyń +7 (727) 250 06 00 call - ortalyǵyna júgine alady.
