31 naýryzda túste Nur-Sultan qalalyq densaýlyq saqtaý basqarmasynyń jetekshisi Sáýle Qisyqova qalada 50 jastaǵy er adam koronavirýstan kóz jumdy dep habarlady. Marqum 21 naýryzda aýrýhanaǵa jatqyzylǵan.
"Bir ai aýyryp, meditsinalyq kómekke júginbegen. Jumysy jeke issaparlarmen bailanysty bolǵan. Onymen jaqyn aralasqan otbasy músheleri jáne áriptesteri barlyǵy 31 adam aýrýhanaǵa jatqyzyldy" dedi Qisyqova.
Jaqyn bailanysta bolǵan 55 adam úi karantinine jiberilgen. Marqumnyń eki jaqynynan koronavirýs anyqtalǵan.
Buǵan deiin 26 naýryzda Aqmola oblysy Qosshy aýylynda 65 jastaǵy áiel adam koronavirýstan qaitys bolǵan. Osylaisha Qazaqstanda koronavirýstan barlyǵy eki adam kóz jumdy.
Sońǵy derek boiynsha, Qazaqstanda koronavirýs juqtyrǵan naýqastar sany 325-ke jetken. Nur-Sultan qalasy koronavirýs juqtyrǵandar sany boiynsha respýblikada birinshi orynda tur. Munda 175 adamnan virýs tabylǵan. Almatyda - 82, Qaraǵandy men Atyraýda - 13 naýqas tirkelgen. Eldiń basym bóliginde shekteý sharalary engizilgen.
