Midjourney neiron jelisi arqyly jasalǵan keskin
Qazaqstanda keibir dini kiimderdi kiiýge shekteýler engizý máselesi qaralady. Bul týraly Mádeniet jáne aqparat ministri Aida Balaeva aitty, - dep habarlaidy "Ult aqparat".
Vedomstvo basshysy jýrnalistiń "nikab, hidjab pen qysqa shalbarǵa tyiym salyna ma?" degen suraǵyna jaýap berdi. Ministrdiń aitýynsha, osy máselege qatysty zań talaptary kúsheitiledi.
"Árine, biz tiisti normalardy zerdelep, usynatyn bolamyz. Ásirese, qoǵamdyq oryndarǵa qatysty. Ondai tájiribe álem boiynsha keńinen taraǵan. Óitkeni bul - ulttyq qaýipsizdik máselesi. Qoǵamdyq oryndarda beti jabylǵan adamdardy taný (adamnyń jeke basyn anyqtaý - esk.) óte qiyn. Bul qoǵammen birge zerttelip, talqylanatyn bolady. Al biz quziretti organ retinde osy baǵytta zańnamalyq normalardy qatańdatý boiynsha jumys isteimiz", - dedi Balaeva OKQ brifinginde.
Ol zańǵa ózgerister engizý nemese jańa zań jobasyn ázirleý biraz ýaqytty qajet etetinin aitty. Aldymen jumys toby qurylyp, túzetýler tujyrymdamasy talqylanady, keiin zań Úkimettiń zań jobalaý jumystarynyń reestrine engiziledi, sodan keiin ǵana Májilis pen Senatqa jiberiledi.
"Osy oraida depýtattar da bastama kóterdi. Sony eskere otyryp, bul máseleni jaqyn arada depýtattyq korpýspen birge qarastyramyz dep oilaimyn", - dedi Balaeva.
Aita keteri, jaqynda Senat depýtaty Nurtóre Júsip elimizde destrýktivti kúshterdiń tamyr jaiyp bara jatqanyna alańdaýshylyq bildirdi. Osy oraida senat depýtattary jastardy teris dini aǵymdardan qorǵaý úshin birqatar usynys jasady.
