Midjourney نەيرون جەلٸسٸ ارقىلى جاسالعان كەسكٸن
قازاقستاندا كەيبٸر دٸني كيٸمدەردٸ كييۋگە شەكتەۋلەر ەنگٸزۋ مەسەلەسٸ قارالادى. بۇل تۋرالى مەدەنيەت جەنە اقپارات مينيسترٸ ايدا بالاەۆا ايتتى, - دەپ حابارلايدى "ۇلت اقپارات".
ۆەدومستۆو باسشىسى جۋرناليستٸڭ "نيكاب, حيدجاب پەن قىسقا شالبارعا تىيىم سالىنا ما?" دەگەن سۇراعىنا جاۋاپ بەردٸ. مينيستردٸڭ ايتۋىنشا, وسى مەسەلەگە قاتىستى زاڭ تالاپتارى كٷشەيتٸلەدٸ.
"ەرينە, بٸز تيٸستٸ نورمالاردى زەردەلەپ, ۇسىناتىن بولامىز. ەسٸرەسە, قوعامدىق ورىندارعا قاتىستى. ونداي تەجٸريبە ەلەم بويىنشا كەڭٸنەن تاراعان. ٶيتكەنٸ بۇل - ۇلتتىق قاۋٸپسٸزدٸك مەسەلەسٸ. قوعامدىق ورىنداردا بەتٸ جابىلعان ادامداردى تانۋ (ادامنىڭ جەكە باسىن انىقتاۋ - ەسك.) ٶتە قيىن. بۇل قوعاممەن بٸرگە زەرتتەلٸپ, تالقىلاناتىن بولادى. ال بٸز قۇزٸرەتتٸ ورگان رەتٸندە وسى باعىتتا زاڭنامالىق نورمالاردى قاتاڭداتۋ بويىنشا جۇمىس ٸستەيمٸز", - دەدٸ بالاەۆا وكق بريفينگٸندە.
ول زاڭعا ٶزگەرٸستەر ەنگٸزۋ نەمەسە جاڭا زاڭ جوباسىن ەزٸرلەۋ بٸراز ۋاقىتتى قاجەت ەتەتٸنٸن ايتتى. الدىمەن جۇمىس توبى قۇرىلىپ, تٷزەتۋلەر تۇجىرىمداماسى تالقىلانادى, كەيٸن زاڭ ٷكٸمەتتٸڭ زاڭ جوبالاۋ جۇمىستارىنىڭ رەەسترٸنە ەنگٸزٸلەدٸ, سودان كەيٸن عانا مەجٸلٸس پەن سەناتقا جٸبەرٸلەدٸ.
"وسى ورايدا دەپۋتاتتار دا باستاما كٶتەردٸ. سونى ەسكەرە وتىرىپ, بۇل مەسەلەنٸ جاقىن ارادا دەپۋتاتتىق كورپۋسپەن بٸرگە قاراستىرامىز دەپ ويلايمىن", - دەدٸ بالاەۆا.
ايتا كەتەرٸ, جاقىندا سەنات دەپۋتاتى نۇرتٶرە جٷسٸپ ەلٸمٸزدە دەسترۋكتيۆتٸ كٷشتەردٸڭ تامىر جايىپ بارا جاتقانىنا الاڭداۋشىلىق بٸلدٸردٸ. وسى ورايدا سەنات دەپۋتاتتارى جاستاردى تەرٸس دٸني اعىمداردان قورعاۋ ٷشٸن بٸرقاتار ۇسىنىس جاسادى.
