Dini ǵuryp boiynsha ǵana nekesin qiyp, resmi túrde tirkeýge turmaǵan qazaqstandyqtar jazalanatyn bolady. Osy kúzde Májiliske qaralymǵa beriletin zań jobasyna osyndai normalar engiziledi, - dep habarlaidy kaz.tengrinews.kz tilshisi.
Din isteri jáne azamattyq qoǵam ministri Nurlan Ermekbaev úkimet otyrysynyń úzilisinde dini qyzmet jáne dini birlestikter týraly zań jobasy jyl sońyna deiin qabyldanýy kerek ekenin málimdedi. Zańdaǵy normalardyń biri nekege turýǵa qatysty.
"Neke qiiý institýtyn retteý. (...) Qazir dini ǵuryp boiynsha neke qiyp, AHAJ-ǵa tirkeýge turmaityndar bar. Bul zań júzinde durys emes. Munyń jolyn kesý úshin zańǵa tolyqtyrý engiziledi. Iaǵni resmi túrde tirkeýge turmaǵandardyń jazasy qatańdatylýy múmkin", - dedi ministr jýrnalisterge.
Ministrdiń sózinshe, zań jobasynda dini bilim men kiimge qatysty ózge de máseleler qarastyrylǵan.
"Kámeletke tolmaǵandardy dinge tartýdy retteý. (...) Destrýktiv ideologiialyq jáne dini aǵymdardyń syrtqy kórinisine qatysty. Ol fashistik svastika bolýy múmkin, qandai da bir násildik, ulttyq uiymdardyń belgisine qatysty", - deidi ministr.
