Dene shynyqtyrý muǵalimderi sabaqtan tys sport sabaqtaryn júrgizgeni úshin bazalyq laýazymdyq jalaqydan 100 paiyz mólsherinde qosymsha aqy alýy múmkin. Bul týraly QR Mádeniet jáne sport ministri Aqtoty Raiymqulova málim etti, dep habarlaidy "QazAqparat".
«Memleket basshysynyń 2019 jylǵy Qazaqstan halqyna Joldaýyn iske asyrý boiynsha Jalpyulttyq is-sharalar josparynyń 64-tarmaǵyn oryndaý aiasynda Dene shynyqtyrý jáne buqaralyq sportty damytý jónindegi 2020-2025 jylǵa arnalǵan keshendi jospary ázirlendi. Bul josparda múddeli memlekettik organdardyń, jergilikti atqarýshy organdardyń usynystary tolyq eskerilip, QR Premer-Ministrimen bekitildi. 2016 jyly Elbasy Nursultan Ábishuly Nazarbaev óziniń Jarlyǵymen halyqty dene shynyqtyrý jáne sportpen júieli túrde shuǵyldanýǵa tartý deńgeiin 35% - ǵa deiin arttyrýdy tapsyrǵan bolatyn. Bul keshendi jospar osy kórsetkishke qol jetkizýdi jáne halyqtyń dene shynyqtyrý men sportpen ainalysýy arqyly salaýatty ómir saltyna umtylysyn qalyptastyrýdy kózdeidi», - dedi ministr Ortalyq kommýnikatsiialar qyzmetindegi onlain baspasóz máslihatynda.
Bul turǵyda halyqtyń barlyq jas sanattary arasynda dene shynyqtyrý men buqaralyq sportty damytýdy jáne balalar úshin sporttyq infraqurylymǵa barynsha qol jetkizý jónindegi sharalar qamtylǵan. Keshendi jospar 34 tarmaq pen 5 negizgi baǵyttan turady: normativtik-quqyqtyq qamtamasyz etý, mektep jáne stýdenttik sport, sport jelilerin keńeitý, salaýatty ómir saltyn nasihattaý jáne keńinen taratý, sporttyq-buqaralyq is-sharalary.
Buqaralyq sportty damytý, sondai-aq dene shynyqtyrýmen jáne sportpen shuǵyldanatyndardyń sanyn arttyrý maqsatynda keshendi josparda negizgi baǵyttar boiynsha Qazaqstan Respýblikasynyń 8 zańnamalyq aktisine 33 túzetý engize otyryp, buqaralyq sport jónindegi zań jobasy Parlament Májilisine engizildi.
«Zań jobasyna dene shynyqtyrý muǵalimderine sabaqtan tys sport sabaqtaryn júrgizgeni úshin bazalyq laýazymdyq jalaqydan 100 paiyz mólsherinde qosymsha aqy engizilip otyr. Sondai-aq, zań jobasynda ulttyq sport túrlerin damytý boiynsha sharalar kózdelgen. Bilim berýdiń barlyq deńgeilerinde dene tárbiesi boiynsha sabaqtarda dene shynyqtyrý jáne sport salasyndaǵy ýákiletti organ bekitken tizbege sáikes, ulttyq sport túrleri boiynsha mindetti komponent kózdelip otyr», - dedi Aqtoty Raiymqulova.
