QR Ekologiia, geologiia jáne tabiǵi resýrstar ministrliginiń bastamasymen «Taza Qazaqstan» aktsiiasy aiasynda adamdar jii demalatyn oryndardyń ekologiialyq ahýaly men tabiǵi tazalyǵyn baqylaityn respýblikalyq reid óz jumysyn bastady, dep habarlaidy QazAqparat.
«Ózderińiz bilesizder, sońǵy kezde elimizde qorshaǵan ortaǵa degen adamdardyń teris qarym-qatynasyna qatysty Prezident úlken syn aitqan bolatyn. Onyń ishinde Kóbeituz oqiǵasy, Kaspiidegi itbalyqty jábirleý, Almaty oblysynda lotosty julý jáne taǵy basqa jaittardy ataýǵa bolady. Memleket basshysy oryn alǵan oqiǵalarǵa qatysty adamdardyń ekologiialyq mádenietiniń tómendigin aita kele, osy baǵytta jumys isteý kerektigin naqty tapsyrdy. Osy oraida bizdiń ministrlik Ishki ister ministrligimen birlesip, demalys oryndary men basqa da adamdar jii demalatyn mekenderge reidti bastadyq. Ondaǵy maqsat – qoqys úiindileri oryndaryn anyqtap, olardy joiý», - deidi ministrlikke qarasty ekologiialyq retteý jáne baqylaý komitetiniń tóraǵasy Zýlfýhar Joldasov.
Respýblikalyq tazalyq reidiniń alǵashqy sapary Býrabaidan bastaldy.
«Býrabai - elimizdegi halyq jii demalatyn oryndardyń biri. Bul jerge bir demalystyń ózinde 50 myń adamǵa deiin keledi. Árine, onyń bári emes, degenmen kóbi sońynan kóp qoqys qaldyryp ketedi. Býrabaidyń qoqys qaldyǵy boiynsha basty problemasy - bul jerde sanktsiialanǵan qoqys poligony joq. Odan bólek, kei demalys oryndary qorshaǵan ortaǵa ziian keltirmeý printsipin ustanbaidy. Bul baǵytta búginde ákimdik máseleni sheshý jaǵyn qarastyrýda. Sondyqtan bul ekoreid jaz boiy jalǵasady», - deidi ol.
Reid barysynda elimizdiń barlyq óńirleri boiynsha demalys oryndary men ózen, kól, taýly aimaqtardyń tazalyq jaǵdaiy tekserilip, sol jerde tiisti sharalar qabyldanady.
Sondai-aq, bul sharaǵa quzyrly organdar men jergilikti atqarýshy organdardyń jaýapty mamandary tartylady.
