13 naýryz kúni Qazaqstanda PTR testi oń shyqqan 1049 naýqas tirkeldi. Bul týraly Koronavirýsty taratpaý jónindegi vedomstvoaralyq komissiianyń Telegram-kanalynda habarlandy. Bul – 9 aqpannan bergi eń joǵarǵy kórsetkish.
Resmi derekke qaraǵanda, Almatyda koronavirýs indeti qaita órshi bastaǵan. Qalada bir kúnde 360 naýqas tirkelgen. Qoǵamdyq densaýlyq saqtaý ulttyq ortalyǵynyń málimetinshe, Almatyda bir kúnde buryn-sońdy munshalyq kóp naýqas tirkele qoimaǵan. Qala birneshe kún buryn virýstyń taraýy boiynsha "qyzyl aimaqqa" kirgen.
Aimaqtar boiynsha ekinshi joǵarǵy kórsetkish - Nur-Sultan úlesinde. Qalada bir kúnde 173 naýqas tirkelgen. Bul – 24 qańtardan keiingi eń úlken kórsetkish. Sol kúni 211 naýqas tirkelgen.
Táýlik ishinde 595 naýqas jazylyp shyqqan.
Osylaisha, Qazaqstanda koronavirýs juqtyrǵany PTR testimen rastalǵan naýqastardyń jalpy sany 223 720 adamǵa jetip otyr. Onyń 206 149-y jazylǵan, 2851-i qaitys bolǵan. Koronavirýstan kóz jumǵandardyń bul statistikasyna virýs juqtyrǵany rastalǵan, biraq "ózge sebepten qaitys boldy" degen júzdegen adam kirmei qalǵan.
Qazaqstanda budan bólek PTR testimen rastalmaǵan, biraq aýrý belgileri boiynsha koronavirýsqa uqsaityn pnevmoniia esebi de júrgizilip keledi. 12 naýryzdaǵy derekke qaraǵanda, 1 tamyzdan beri barlyǵy 49 801 naýqas tirkelgen, onyń 653-i qaitys bolǵan.
Koronavirýs pnevmoniiasy esebiniń júrgizilýi indet órshýiniń sharyqtaý sheginen keiin bastaldy.
Densaýlyq saqtaý ministrliginiń dereginshe, 2020 jyly bir shildeniń ózinde 152 myńdai adam pnevmoniiamen tirkeldi. Onyń nesheýi koronavirýsqa uqsaityn pnevmoniia ekeni aitylmady, biraq eshqaisysy 1 tamyzdan keiin ǵana bastalǵan esepke kirmedi.
