2020 jylǵy qańtar-qarasha ailarynda Qazaqstanda et óndirý kólemi (qus etin qospaǵanda) 435 myń tonnadan asty. Bul 2019 jyldyń sáikes kezeńimen salystyrǵanda 3,2% artyq, dep habarlaidy "Ult aqparat".
QR Aýyl sharýashylyǵy ministrliginen málim etkendei, sondai-aq, shujyq ónimderin óndirý 12% (48-den 53,8 myń tonnaǵa deiin), et konservilerin óndirý 13,8% (7,7-den 8,8 myń tonnaǵa deiin) artty.
Siyr etiniń eksporty ótken jyldyń qańtar-qazan aralyǵynda 26,4 mln AQSh dollaryn qurady.
«Otandyq daiyn ónim óndirisiniń ósýi mal sharýashylyǵy jáne et óńdeý salalaryndaǵy memlekettik kómektiń ulǵaiýyna bailanysty boldy. Sonymen qatar, óńdeýshi kásiporyndar qýatynyń artýyna QR AShM-nyń ótken jyly tiri mal eksportyna moratorii jariialaýy oń áserin tigizdi. Bul shara maldyń elden jappai shyǵarylýyn toqtatyp qana qoimai, Prezidenttiń tapsyrmasyna sáikes daiyn ónim óndirisiniń kólemin ulǵaitýǵa múmkindik berdi», - deidi ministrlikten.
Aita keteiik, agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasy aiasynda et óńdeýshiler kelesidei qoldaý sharalary kórsetiledi:
1) jumys istep turǵan zaýyttardy jańǵyrtýǵa jáne jańa zaýyttardy salýǵa investitsiialyq salymdardyń bir bóligin óteý (25% deiin);
2) ainalym jáne negizgi quraldarǵa arnalǵan nesieler boiynsha syiaqynyń paiyzdyq mólsherlemesin sýbsidiialaý;
3) «Qarapaiym zattar ekonomikasy» baǵdarlamasy sheńberinde, onyń ishinde et jáne qus etin óndirýshilerge jeńildikpen nesie berý qarastyrylǵan.
Sonymen qatar, QR AShM ógizshelerdi et óńdeý kásiporyndaryna tapsyrý kezinde fermerlerdi sýbsidiialaý sharalaryn engizdi. Mal ósirýshiler memleketten qosymsha bir keli tiri salmaq úshin 200 teńgeden ala alady.
