Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine oiyn biznesi máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy "Ult aqparat".
«Zań jobasy oiyn biznesi salasyndaǵy zańnamany jetildirýge, býkmekerlik keńseler men totalizatordyń qyzmetin baqylaýdyń tiimdiligin artyrýǵa baǵyttalǵan. Zań jobasyn qaraý barysynda depýtattar jańa oiyn aimaqtaryn ashý týraly normalardy alyp tastaý boiynsha usynys engizdi. Sonymen birge, qujatqa depýtattar býkmekerlik keńseler men totalizatorlardyń kassalaryn Almaty oblysy Qapshaǵai sý qoimasynyń jaǵalaýyndaǵy jáne Aqmola oblysy Býrabai aýdanyndaǵy eki oiyn aimaǵy aýmaqtarynda ornalastyrý boiynsha túzetýler engizdi. Osyǵan bailanysty endi býkmekerlik keńseler men totalizatorlardyń kassalary eldi mekenderden atalǵan oiyn aimaqtaryna kóshiriletin bolady», - dedi depýtat Sáken Ótebaev.
Onyń sózine qaraǵanda, depýtattar jaqyn týystarynyń ótinishi boiynsha sottyń qumar oiyndardy jáne bás tigýdi teris paidalanatyn adamdardy áreket qabileti shekteýli dep taný boiynsha usynys engizdi. Iaǵni, endi otbasy músheleri men jaqyn týystary óz jaqyndaryn ziiandy áreketten shekteý quqyǵyna ie bola alady.
«Zań jobasyna sot aktisi negizinde Qazaqstan Respýblikasynyń aýmaǵynda qyzmeti zańsyz dep tanylǵan oiyn biznesin sheteldik uiymdastyrýshylardyń paidasyna tólemderdi júzege asyrý boiynsha qyzmetter kórsetýge tyiym salýǵa baǵyttalǵan túzetýler engizildi», - dedi S. Ótebaev.
