Foto: primeminister.kz
Keiingi 5 jylda ishki jalpy ónimdegi shaǵyn jáne orta biznes úlesiniń turaqty ósýi baiqalyp otyr. Bul týraly Ulttyq ekonomika ministri Álibek Qýantyrov aitty, dep habarlaidy Kazinform agenttigi.
«2019-2023 jyldar aralyǵynda qazaqstandyq shaǵyn jáne orta kásipkerliktiń ekonomikaǵa qatysýy úlesi 31,7 paiyzdan 36,4 paiyzǵa deiin, iaǵni 4,7 paiyzdyq tarmaqqa ósti. 2023 jyly jumyspen qamtylǵandardyń jalpy sany 23,8 paiyzǵa ósip, 4,2 mln adamǵa jetti», - dedi Qýantyrov Senatta «Qazaqstan Respýblikasynda shaǵyn jáne orta kásipkerlikti damytý» taqyrybynda ótip jatqan Úkimet saǵatynda.
Ministrdiń aitýynsha, biylǵy 1 qazandaǵy jaǵdai boiynsha tirkelgen shaǵyn jáne orta biznes sýbektileriniń jalpy sany 2,2 mln. Onyń 99,9 paiyzy shaǵyn kásipkerlik, qalǵan 0,1 paiyzy orta kásipkerlik sýbektisi.
«Kásipkerlik belsendilik deńgeii 89,7 paiyzǵa jetti. Bul kórsetkish jalpy tirkelgen kásipkerlik sýbektileri arasynda jumys istep turǵandarynyń úlesin bildiredi. Bul rette, orta kásipkerlik sýbektileri arasyndaǵy belsendilik shaǵyn kásipkerlikke qaraǵanda 6,7 paiyzdyq tarmaqqa joǵary», - dedi vedomstvo basshysy.
Sonymen qatar ol elde úsh jyl boiy shaǵyn jáne mikrobizneske tekserý jasaýǵa moratorii qoldanylyp kele jatqanyn eske saldy.
«Budan bólek, «taza paraqtan retteý» qaǵidaty sátti engizilip jatyr. 10 myńnan astam ózekti emes talap anyqtaldy. Onyń 9 myńy zańǵa táýeldi qujat deńgeide alynyp tastaldy, al qalǵandary Parlamenttegi zań jobasy aiasynda jyl sońyna deiin joiylady. Sondai-aq táýekelderdi basqarý júiesi (TBJ) avtomattandyrylady, ol 2024 jylǵy 1 qańtardan bastap adamnyń qatysýynsyz tekserýlerdi belgileýge múmkindik beredi. Bul turǵyda biznesti josparly tekserý 2 ese jáne aiyppuldar sany birneshe ese azaiady», - dedi Álibek Qýantyrov.
