Salyq kodeksine engiziletin ózgerister legi talqylǵan Senat otyrysynda depýtat Murat Baqtiiaruly bailyq salyǵyn engizýdi usyndy, dep habarlaidy "Ult aqparat".
«Memleket basshysy 2019 jylǵy Joldaýynda «Jalpy ishki ónim men halyq tabysynyń artýyna qaramastan qoǵamda múliktik jiktelý úderisi saqtalyp otyr, tipti kúsheiip barady. Bul – alańdatarlyq faktor. Sondyqtan oǵan erekshe nazar aýdarý kerek» degen bolatyn. Bul máseleni sheshýdiń kóptegen joly bar. Sonyń bir joly retinde bailyqqa salyq salýdy engizýdi qaraýǵa bolady. Mundai halyqaralyq tájiribe kóptegen elde bar. Biýdjetke túsetin túsimderdi sán-saltanatqa arnaiy salyq engizý búgingi kúni óte ózekti másele bolyp sanalady. Aýqatty qazaqstandyqtar halyq aldynda áleýmettik jaýapkershilikte bolýǵa jáne óz bailyǵyn eldiń damýyna baǵyttaýy tiis. Táýelsizdiktiń 30 jyldyǵynyń ishinde halyqtyń bai men kedei toptarynyń arasyndaǵy alshaqtyq aitarlyqtai óskenin kórip otyrmyz. Bul jerde másele iahtalar, ushaqtar, elitaly jyljymaityn múlikter, qymbat avtoóklikter, zergerlik buiymdar sekildi sán-saltanatty zattarǵa salyq salýǵa qatysty bolyp otyr. Bailyq salyǵyn engizý – salyq salýdyń ádiletti júiesin qalyptastyrady dep esepteimin», - dedi Murat Baqtiiaruly Salyq kodeksine engiziletin ózgerister legi talqylanǵan Parlament Senatynyń otyrysynda.
Bul máselege bailanysty depýtat Ulttyq ekonomika ministri Rýslan Dálenovtyń ustanymyn surady.
«Árine mundai josparymyz bar. Qazirgi tańda jańa Salyq kodeksinde ádiletti jáne aiqyn printsipter kózdelgen. Salyq salý - tabystardy teńestirýdiń tiimdi quraldarynyń biri. Onda eki baǵyt bar. Bul – múliktiń baǵasyna qarai joǵary salyq salý jáne tapqan tabysqa salyq salý. Tabysqa salyq salý nemese jeke tabys salyǵy boiynsha elde 10 paiyzdyq biryńǵai mólsherleme qoldanylady. Biraq tómendetilgen mólsherleme de bar. 70 myń teńgege deiingi tabystar qosymsha shegerimder qoldanylady. Iaǵni bul rette tabystarǵa tómen salyq salynady. Osylaisha jeke tabys salyǵy boiynsha differentsiialanǵan ádis qoldanylady. Salyq kodeksinde kólik salyǵy, múlik salyǵy boiynsha úlken aiyrmashylyq bar. Múliktiń quny joǵary bolsa oǵan salynatyn salyqtyń da mólsheri joǵary bolady. Kólik salyǵy boiynsha aiyrmashylyq 8-600 myń teńge aralyǵynda tur. Meniń oiymsha bul salyq salýdyń bul ádisi tiimdi qural. Salyq salý arqyly teńsizdikti tómendetýge bolady», - dedi ministr.
Atalmysh másele boiynsha Senat tóraǵasy Máýlen Áshimbaev Rýslan Dálenovke bul máseleni jiti nazarǵa alýdy tapsyrdy.
