Elimizde baspana kezegindegi turǵyndar sany jyl saiyn 50 myń adamǵa artyp keledi. Bul týraly Úkimet otyrysynda turǵyn úi saiasatynyń jańa tásilderin jariialaǵan QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Baspana alý kezeginde turǵan azamattardyń sany jyl saiyn 50 myńǵa deiin artyp keledi. Búgingi tańda ol 548 myńǵa jetti. Kezektegi kópbalaly otbasylar, jetim balalar, múgedek balalary bar otbasylar jáne halyqtyń basqa da áleýmettik osal toptarynyń tabysy otbasy múshesine shaqqanda eń tómengi 1 kúnkóris deńgeiinen tómen bolǵan jaǵdaida, baspanamen qamtamasyz etý úshin jalǵa beriletin turǵyn úidi sýbsidiialaý tetigi arqyly júzege asyrý usynylady», - dedi ministr.
Onyń aitýynsha, memlekettik qyzmetshiler, biýdjet qyzmetkerleri, tolyq emes otbasylar jáne basqa da kezekte turǵan azamattardyń tabys kólemi eń tómengi 1 kúnkóris deńgeiinen joǵary azamattardyń bul sanaty jańa baspanaǵa jeńildetilgen zaem alý arqyly turǵyn úi satyp ala alady.
Sonymen qatar, 2021 jylǵy 26 qańtarda Úkimettiń keńeitilgen otyrysynda Memleket basshysy turǵyn úi saiasatyn jetildirý boiynsha usynystar engizýdi tapsyrdy. Tapsyrmany oryndaý úshin «Nurly jer» memlekettik baǵdarlamasynda belgilengen baǵa parametrleri boiynsha salynyp jatqan turǵyn úidiń 50 paiyzyn berý shartymen jergilikti atqarýshy organdarǵa áleýmettik nysandar jáne baspana salý úshin jer ýchaskelerin alý quqyǵyn berý usynylady. Ol qurylys salýshynyń óz qarajaty esebinen júzege asyrylýy tiis. Bul nysandar qurylys salýshynyń óz ýchaskelerinde salynsa, balama jer ýchaskelerin berý nemese qurylys salýshynyń shyǵyndaryn óteý usynylyp otyr. Turǵyn úi salýǵa arnalǵan jer telimderi jer ýchaskesin satý nemese ony jalǵa alý quqyǵyn satý jónindegi saýda-sattyqty uiymdastyrý jáne ótkizý qaǵidalaryna sáikes beriledi», - dedi Beibit Atamqulov.
